Pisortani immikkoortortap ineriartortinnera pillugu Anda Uldumimit ilassutigisat

Pisortani immikkoortortap ineriartortinnera pillugu Ataatsimeersuarnermi, Nuummi HHE-mi 4. Juni 2015-imi pisussami Anda Uldumimit ilassutigisat.

Aningaasaqarnikkut sinaakkutissat nerukitsut, aningaasaqarnermik siuarsarnermillu attassisinnaasumik pisariaqartitsineq – politikkikkut nerukitsunik toqqartariaqakkat. Tassaapput Hotel Hans Egedemi ingerlasumi pisortani immikkoortortap ineriartortinnera pillugu ataatsimeersuarnermi pingaarnertut sammisat Anda Uldumip saqqummiussai.

Ingammik naalagaaffimmit tapiissutit nalingisa annikilliartorneri, kommunit aningaasaqarnerliornermik unammisaqartut, ingerlatsinikkut aningaasartuutit qaffakkiartortut kiisalu kinguppattassallu ikiliartortut siunissamut aningaasaqarnermik ataatsimoorussatsinnik sammisarilluinnartariaqarnerput pisariaqartippaa. Saniatigullu inuusuttut meeqqat atuarfianiik anisartut ilinniaqqinnissamut ingerlaqqinngitsoortartut suliffeqanngitsullu immikkut ittumik iliuuseqarfigisariaqarpagut. 2014-imi inuusuttut 16-niik – 18-it tungaanut ukiullit akornanni pingasuugaangata marluk ilinniarfinnut ingerlaqqinneq ajorput. Allatut oqaatigalugu: Kivitseqatigiinnineq annertooq tuaviornerpaamik aallartisartariaqarpoq.

”Maannakkut iliuuseqartussanngorpugut. Maannakkut aningaasaqarnitta aaqqissuuteqqinnissaanut periarfissaqarpugut, tamaaliussaagullu inuiaqatigiinni sanngiinnerpaat qimataatinnagit naleqquttumik mianersortumillu iliorluta”, Anda Uldum oqarpoq, Naalakkersuisut tamatumunnga iliuuserisassat pisariaqartut tamaasa atornissaannut piareersimasut erseqqissarlugu.

Naalakkersuisut isumaliutigisaattut aaqqissuusseqqinnerit malunnartussat arlallit ilaat tassaapput attassinissamik siuarsarnissamillu pilersaarusiorneq, missingersuusiortarnermik inatsisitta iluarsaannissaa, atugarissaarnermullu ikiorsiissuterpassuarnik aaqqissuusseqqinnerit. Iliuuserissat pingaarutillit allat tassaapput inuiaqatigiinni akuuffigisatsinni siuarsarnerup pilersinnissaa, minnerunngitsumillu: ilinniagaqarsimassutsitta qaffatsinnissaa – inuusuttullu 30-t inorlugit ukiullit ilinnialersinnissaat imaluunniit suliffeqartilernissaat.

”Aaqqissuusseqqinnerit Naalakkersuisut kisimik isumagisinnaanngilaat. Tamatta ilapittuuteqassaagut. Tamatta ataatsimoorluta angorusatta tikinnissaannut innuttaasut, Inatsisartut kommunillu suliaqarlutik peqataassapput”, ataatsimeersuartunut Aningaasaqarnermut Naalakkersuisup kaammattuutaa taama ippoq.

Saqqummiussaq