Puisit amii EU-mut eqquteqqusaanngitsut pillugit suliap killiffia

Puisit amiinit tunisassiat

”Suliap EU-mi ingerlanera naammagisimaarpara!” Taamatut oqarpoq Aalisarnermut, Piniarnermut
Nunalerinermullu Naalakkersuisoq Karl-Kristian Kruse, EU-p iluani parlamentimi
Niuerfimmut Atuisartullu illersugaanerannut Ataatsimiititaliami (IMCO) taasititsineq
innersuutigalugu. Ataatsimiititaliap EU-mi tunisassiat puisineersut eqquteqqusaannginneranut
ataanilu Inuit immikkut pineqarnissaat pillugu allannguutissatut siunnersuut
eqqartorsimavaa.

Ullumi IMCO-mi taasinerup takutippaa Inuit immikkut pineqarnissaasa ingerlaannarnissaa
annertuumik tapersersorneqartoq, taamaasinikkullu Kalaallit Nunaata tunisassianik
puisineersunik EU-mi nunanut ilaasortanut tuniniaaginnarsinnaassallutik. Danmarkip
Kalaallit Nunaatalu allannguutissatut siunnersuutit arlalissuit akuersissutigineqarnissaat
sulissutigisaat ataatsimiititaliap akuersissutigai, s.a. puisit pillugit paasititsiniaanissaq
aammalu peqqussutip inuiaqatigiinnut Inunnut sunniutaanik misissuisarnissaq.
Ajuusaarnaraluartumik immikkut akuersissutip aappaa imarmiut pisuussutit aqunneqarnissaannut
tunngasoq Sverigemit, Finlandimit aamma Letlandimit killilimmik puisinniarnissamut
periarfissiisoq taasinermi akuerineqanngitsoorpoq. ”Ajuusaarnarpoq EU-mi
nungukkiartuutaanngitsumik puisinik iluaquteqarsinnaaneq taamak annikitsigisumik
paasinniffiummat, tassami piffimmi puiserpassuit aalisartunut unammillertaammata”,
Piniarnermut Naalakkersuisoq Karl-Kristian Kruse ajuusaarluni oqarpoq.

Suliaq EU-p iluani aasap immaqalu ukiap ingerlanerani suliareqqinneqartussaavoq,
Naalakkersuisullu suliap ingerlarnga qanimut malinnaaffigissavaat aammalu ajunnginnerpaamik
angusaqarnissaq angutserlugu ingerlaavartumik sunniiniarneq ingerlanniarlugu
qallunaat naalakkersuisui qanimut suleqatigalugit.

Annertunerusumik paasisaqarusukkaanni immikkoortortaqarfimmi pisortamut saaffiginnittoqarsinnaavoq: Amalie Jessen
Tlf. nr. + 299 55 33 42 eller + 299 34 53 04
amalie@nanoq.gl