Suliassaqarfiup angerlaanneqarsinnaanera misissorneqassaaq

Sullivinni avatangiisinut tunngasumik suliassaqarfiup angerlaanneqarsinnaanerata iluaqutissartai ajoqutaasinnaasullu misissorneqassapput

Tusagassiuutini oqaatiginiarneqarmat Naalakkersuisuni  assigiinngitsumik isumaqartoqartoq sullivinni avatangiisinut tunngasumik suliassaqarfiup angerlaanneqarsinnaaneranut tunngatillugu, Naalakkersuisut erseqqissassavaat taamaattoqanngitsoq.

Sullivinni avatangiisinut tunngasumik suliassaqarfiup angerlaanneqarsinnaaneranut tunngasumik apeqqut Naalakkersuisooqatigiit isumaqatigiissutaannut ilaavoq, Inuussutissarsiutinut, Suliffeqarnermut, Niuernermut Nunanullu Allanut Naalakkersuisoqarfiup suliassaqarfiata iluani.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup ulloq 4. februar 2015 Beskæftigelsesminister Henrik Dam Kristensen ataatsimeeqatigaa. Ataatsimiinnermilu tassani ilaatigut oqaloqatigiissutigineqarpoq qanoq aaqqissuussinikkut sullivinni avatangiisinut tunngasumik suliassarfiup angerlaanneqarsinnaanerani iluaqutissat ajoqutaasinnaasullu qulaajarneqassasut.

Februarip 9-anili 2015 Naalakkersuisut Tusagassiivianniit tusagassiorfinnut nalunaarummik nassiussisoqarpoq, ilaatigut imaattumik imaqartumik: ”Vittus Qujaukitsoq ilaatigut Beskæftigelsesminister Henrik Dam Kristensen-imik ataatsimeeqateqarpoq, suliffeqarnermut suliassaqarfiup iluani suleqatigiissutissat pillugit. Illuatungeriillu isumaqatigiissutigaat qulaajaalluni suliamik aallartitsisoqassasoq, tassanilu sullivinni avatangiisinut tunngasumik suliassaqarfimmik Kalaallit Nunaannut angerlaassisinnaanerup pitsaaqutissartai ajoqutissartaalu qulaajarneqassasut.”

 

Inuussutissarsiornermut, Suliffeqarnermut, Niunernermut Nunanullu Allanut Tunngasunut Naalakkersuisoq Vittus Qujaukitsumit ilassutissanik oqaaseqaatissanik pissarsiniaruit naalakkersuisumut allatsi attavigiuk Thomas Kjærgaard +299 58 08 58 e-mail thkj@nanoq.gl.