Oqaluffimmi katititsisinnaanissaq kinguartinneqarpoq

Danmarkimi Folketing-imut qinersinissap aappariinnik suiaassuseqatigiinnik oqaluffimmi katititsisinnaanissaq kinguartitippaa

Aappariit suiaassuseqatigiit oqaluffimmi katissinnaasut, marlunngormat Inatsisartut isumaqatigiittut akuerimmassuk annertuumik nuannaarlunga peqataavunga” oqarpoq Pinngortitamut Avatangiisinut Inatsisinillu Atuutsitsinermut Naalakkersuisoq Mala Høy Kúko.

Aqagukkut, tassa pingasunngorneq ulloq 27. maj, Danmarkimi Statsministerip Helle Thorning-Schmidt-ip Folketing-imut qinersinissaq nalunaarutigaa. Tamatuma kingunerisaanik aappariit suiaassuseqatigiit oqaluffimmi katissinnaanissartik sivisunerulaartumik utaqqisariaqalerpaat. Pinngortitamut Avatangiisinut Inatsisinillu Atuutsitsinermut Naalakkersuisup Mala Høy Kúko-p qaqugu aappariinnik suiaassuseqatigiinnik oqaluffimmi katititsineq pisinnaalissanersoq maannangaaq ullulersinnaannginnamiuk uggoraa.

Suiaassuseqatigiit suiaassuseqatigiinngitsutuulli pisinnaatitaaffeqarnissaat, aammalu katinnermut tunngatillugu kissaatigisarpiamisuut pisinnaanissaat Naalakkersuisunut pingaartorujussuuvoq. Taamaattumik Danmarkip sapinngisamik sukkanerpaamik inatsimmik akuersinissaa anguniarlugu ilungersussaanga, aammalu aappariit suiaassuseqatigiit katerlaat siulliit oqaluffiup tummeraanni takunissaannut qilanaarpunga, kisianni ajoraluartumik naammagittarnerulaartariaqarpugut”, oqarpoq Naalakkersuisoq Mala Høy Kúko.

Oqaluffimmi katititsinerit siulliit kinguartittariaqarnerannut pissutaavoq ilaqutariinnermut inatsisinut suliassaqarfik Naalagaaffiup susassaqarfigimmagu. Taamaattumik taassuma atuutilersinnaanissaanut Danmarkimi Folketing-imi inatsit aatsaat akuerineqaqqaartussaavoq.

 

Annertunerusumik paasisaqarusukkuit utaqqiisaagallartumik allaffiup pisortaa Karen Anne Arleth oqarasuaat angallattagaq 551585 imal. mailikkut knar@nanoq.gl saaffigineqarsinnaavoq.