Akiliisitsilluni piniarneq

2015-imiit 2018-imut ukiuuneranut akiliisitsilluni piniarnissamut ukiunut pingasunut pisassiissutit piffissallu piniarfiusussat aalajangersarneqarneri

2015-imiit 2018-imi ukioq ilanngullugu akiliisitsilluni piniarnissamut pisassiissutissat aamma piffissat piniarfiusussat Aalisarnermut, Piniarnermut Nunalerinermullu Naalakkersuisoq Karl Kristian Kruse-mit aalajangersarneqarput.

Kitaani ukiumoortumik akiliisitsilluni tuttunut pisassiissutit tamakkiisut 580-inik amerlassuseqarput.

Kitaani ukiumoortumik akiliisitsilluni umimmattassiissutit tamakkiisut 680-iupput, Tunumilu 30-nik amerlassuseqarlutik.

Ilanngussaq 1 aamma 2-mi pisassiissutit aamma piffissat piniarfiusussat tabel-inngorlugit ilanngunneqarput. Ilanngussaq 3 aamma 4-mi nunap assingani tuttoqarfiit umimmaqarfiillu takuneqarsinnaapput.

Piffissat piniarfiusut aalajangersaavigineqarneranni akiliisitsilluni piniartitsisartut sivisuumik piffissanik piniarfissinneqarnissaat pingaartinneqarsimavoq uumassusilerisunit siunnersuineq eqqarsaatigalugu. Piniarfiusuni ataasiakkaani immikkut annertuumik susoqarfiusuni piffissaq piniarfiusup naleqqussarnissaa pisariaqarsimavoq, inuussutissarsiutigalugu, sunngiffimmi aamma tammajuitsussarsiniarluni piniartut akornanni imminnut akerleriilernissaat pinngitsoortinniarlugu.

Akiliuteqartitsilluni piniarnermut aaqqissuisumut pingaaruteqarpoq killiliinissamut piumasaqaatit ilisimasaqarfigissallugit, piniartitsinissallu piffissaagallartillugu pilersaarusiortassallugit. Aallaaniat ilarpassui ukioq ataaseq sioqqullugu piniarnissartik pilersaarusiorusuttarpaat. Tassungalu ilaavoq aaqqissuisut killiliinissamut piumasaqaatinik pitsaasunik peqarnikkut, piffissamullu ungasissumut pilersaarusiorsinnaanermigut inuussutissarsiummut annerusumik aningaasaliisinnaanera.
Tammajuitsussanik piniartartunut amerlanerpaanut piniartunit allanit akornusersorneqarnatik piniarsinnaasarneq pingaartuuvoq. Piniarnerup nalaani kisimiissinnaanerup ikittuinnarnut tunngatitsisutut misiginissaa pingaartittartorujussuuaat. Taamaammat pingaaruteqartorujussuuvoq piniartitsinerit piniartunik allanik naammattoorsinani ingerlanneqarsinnaasunik neqerooruteqarsinnaassalluni. Aammalu piniartarnerit amerlavallaannginneri pissutaallutik sumiiffinni arlalinni piffissat piniarfiusussat sivisunerit piareersarfiusimapput.
Kangerlussuarmi: Taamaattorli piniarfik 3-mi Kangerlussuup kujasinnerusortaaniittumi kommunimit kissaatigineqarsimavoq tammajuitsussarsiorluni piniartarnerit inuussutissarsiutigalugu sunngiffimmilu piniartarnerit assigalugit aallartittassasut, tamatumani atuisut kissaatigisaat akueriumallugit. Inuussutissarsiortut piffissamut sivisuumut pilersaarusiorsinnaanissaat eqqarsaatigalugu tamanna 2016-imi aatsaat atuutilersinneqassaaq.
Piniarfiusartuni tamani inuussutissarsiutigalugu sunngiffimmilu piniartarneq akiliuteqarluni piniartarnerup nalaani tamakkiisumik ilaannakortumilluunniit ingerlanneqartartussaassaaq. Taamaalilluni akiliuteqartitsilluni piniartitsinermik aaqqissuisup nammineerluni aalajangissavaa qaqugukkut inuussutissarsiutigalugu sunngiffimmilu piniartarnerit aallartittarnersut misissuiffigisassallugit, taakkulu naapertorlugit piniartitsinissat piareersarlugit.

Sukumiinerusumik paasisaqarusukkaanni saaffigineqassaaq Immikkoortortami pisortaq Amalie Jessen, toqq+ 299 345304 amalie@nanoq.gl

Ilanngussaq 1: Aasaanerani 2015-imiit ukiuunerani 2018-imut tammajuitsussarsiorluni piniarnissamut ukiumoortumik tuttunut pisassiissutit piffissallu piniarfiusussat.

Ilanngussaq 2: Aasaanerani 2015-imiit ukiuunerani 2018-imut tammajuitsussarsiorluni piniarnissamut ukiumoortumik umimmannut pisassiissutit piffissallu piniarfiusussat.

Ilanngussaq 3: Kitaani Sumiiffik 1-11-mut tuttunniarfiit.

Ilanngussaq 4: Kalaallit Nunaanni umimmaqassuseq.