Sisimiuni qamuteralaat ingerlasinnaanerat

Sisimiuni imeqarfiup eqqaani assigaq aqqusaarlugu qamuteralaat ingerlasinnaanerat akuerineqarpoq

Nalunaarut nutaaq pissutigalugu inatsimmik unioqqutitsisoqarnani Sisimiuni imeqarfiup eqqaani assigaq aqqusaarlugu qamuteralaat qanittukkut ingerlasinnaalissapput. Kiisalu illinilersuutit sisoraatinik ujakkaarfissani imeqarfiup eqqaani assikkami illiniliorsinnaapput.

Manna tikillugu Sisimiut eqqaanni imeqarfiup eqqaani assikkami qamuteralannik ingerlaarneq inerteqqutaasimavoq.

Taamaattoq imeqarfiup eqqaa assigaq aqqusaaqqaarnagu qamuteralannik illoqarfiup timaanukarnissaq ajornarpoq. Taamaattumik illoqarfimmi qamuteralaatillit 700-t missaaniittut illoqarfiup timaanut angalaarniartillutik inatsimmik unioqqutitsisariaqartarsimapput.

Maannakkut Sisimiut imeqarfiata eqqaa assigaq pillugu Naalakkersuisut immikkut maleruagassaliorput. Immikkut aqqutissakkoorlutik imeqarfiup eqqaani assigaq aqqusaarlugu qamuteralaat akuerisaallutik ingerlasinnaalerput.

Qamuteralaat sumi tamarmi ingerlaarnerminnut taarsiullugu illernit nalunaaqutsersorneqartut aqqutigisalerpasigut, Sisimiuni imeq imigassat pitsaanerusumik illersorneqassaaq. Qamuteralaat mingutsitsinissamik aarlerinaateqarnera annikitsuutillugu taamaallaat ingerlaartarnissaat, maleruagassani nutaani qulakkeerneqassaaq”, Oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Imeqarfiup eqqaani assikkap ilaa ungasinnerusumiittoq sungiusarfittut sivisuumik atorneqarsimavoq. Tamanna ingerlaannarsinnaavoq. Qamuteralannilli angallattut tatsiniit kuunniillu annikinnerpaamik 30 meterinik ungasitsigisumiittassallutik.

Imeqarfiup eqqaani assikkami illernit piareersarneqarsimasut atorlugit sisoraatinik ujakkaartoqarsinnaavoq. Sisorartartut peqatigiiffiata qangali ujakkaarfigisartagai illinilersuutit atorlugit piareersarnissaannut nalunaarutikkut ajornarunnaarpoq. Tamanna aamma isumaqarpoq illernit akuerineqartut atorneqarpata imeqarfiup eqqaani assikkakkut Arctic Cirkel Race ingerlanneqarsinnaasoq.

Ukiuunerani angallanneq kisimi inatsisitigut akuerineqarpoq. Biilit, motorsikkilit aamma ATV-t suli imeqarfiup eqqaani assikkami ingerlaqqusaanngillat.

Maannakkut kommuni aqqutissanik aamma qamuteralaat ingerlaffigisinnaasaanni nalunaaqutsersuilluni aallartissaaq, soorlu aamma sisoraatinik ujakkaartarfiit nalunaaqutsersorneqassasut. Aatsaat nalunaaqutsersuineq inissinneqarpat qamuteralaat illinilersuutillu imeqarfiup eqqaani assikkami ingerlasinnaalissapput.

Paasissutissat annertunerusut Immikkoortortami pisortamut saaffiginninnikkut pissarsiarineqarsinnaapput: Jeppe Bender Jørgensen  toqq 346709 jepj@nanoq.gl