Sermitsiami demokratiimut misigissuseq(annginneq)

Inissiilaariarta. Aningaasanut inatsimmut isumaqatigiissut maajip tallimaaneersoq, Siumut, Demokraatit Atassutillu peqataaffigisaat, tassaavoq isumaqatigiissut aningaasanut inatsisissatut siunnersuummut ataatsimoorussatut isummaminnik tamanut saqqummiussiffigisaat. Tamanna Sermitsiap pingaarnerutitatut allaaserisamini imatut inerniliiffigaa: Demokratii peersinneqartoq, pingajussaaneernera sioqqullugu pimmat. Qulequttap pikkunarsaarisutut inerniliinera tupiginarpoq – ataqatigiissusermi takusassaanngimmat. Tamanna uterfigeqqissavara.

Pisimasorli, aningaasanut inatsimmut ingerlassap tamarmi qanoq ingerlasimanera uteqqilaarlara:

Isumaqatigiissummi partiit aningaasanut tunngasunut oqaaseqartartuisa atsiuinerat sioqqullugu partiinik ataasiakkaanik, minnerunngitsumillu partiit naalakkersuisunut illua’tungiliuttut marluk kisissaanngingajattunik ataatsimeeqatigisaqattaarpakka. Tamakku akaarinnittumik ingerlanneqarput, ingerlanerini tunisisoqarlunilu tigusisoqartarluni – kontomit pingaarnermit allamut millionit arlallit nuunneqartarlutik. Tamakku saniatigut ataatsimiinnerit nalaanni partiit apeqquteqaatitik tamarmik akissutisiffigaat. Naalakkersuisullu isumaqatigiissut sapinngisamik siamasissoq kissaatigimmassuk illua’tungiliuttut isumaqatigiissummut peqataatinniarlugit annertuumik akuersaarivugut. Ilisimaneqartutulli ajoraluartumik tamanna iluatsitsiviunngilaq.

Illua’tungeriit qaqutiguunngitsukkut isumaqatigiinneq ajornerat isumaqatiginninniarnerni pigajuttarpoq. 2015-imut aningaasanut inatsit pillugu isumaqatiginninniarnerni tamanna pivoq. Aningaasanut inatsimmut isumaqatigiissummi peqataanissartik IA-p aamma Partiip Naleqqap kissaatiginngilaat, tamannalu ajunngilaq. Tassa taakku nalilersuinerat. Taamaattumillu naalakkersuisooqatigiittut partiit naapillutik isumaqatigiissummik atsiuinerat illua’tungiliuttunut Sermitsiamullu tupigusuutigisassaassanngikkaluarpoq.

Isumaqatiginninniarnerit ingerlaqatigalugit Aningaasaqarnermut Ataatsimiititaliap ingerlassaq nalinginnaq suliaqarfigaa, tassaniillutik ataatsimiititaliami ataatsimiinnerit, apeqqutilliinerit, isumasioqatigiinnerit, kiisalu Inatsisartut ataatsimiittarfianni siunnersuummik oqaluuserinninnerit. Apeqqutilliissutaat tamaasa kajumillunga akissuteqarfigaakka, saniatigullu isumasioqatigiinnerni arlalinni peqataallunga, isumasioqatigiinnerni apeqquteqaatit akissuteqarfigisarlugit.

Sermitsiami pingaarnerutitami allapput isumaqatigiissut atsiorneqartoq ”oqallittoqarani, imaluunniit siunnersuutigisassaqarnissamut periarfissaqarani”. Tamanna asuli oqaasiliorneruvoq. Siuliatulli assigiinnik periarfissaqarsimavoq – taamaallaat ilassummik tunngaveqartoqaannarluni, partiimmi ataatsimiinnerni siunnersuutinik saqqummiussinissaminnut periarfissaqarsimapput.

Allanik oqaasertalerlugu: Ataatsimiinnerni taakkunani angakkuarniartoqarsimanngilaq. Najoqqutassaqarluni tamarmik pipput.

Sermitsiamut isumaqatiginninniariaaseq nutaajummat demokratiskiunnginneranik tamanna isumaqanngilaq. Sapaatimmi akunneranut saqqummersartutut aviisip isumaa eqqorsimassagaluarpat Europami nunani amerlanerpaani taava imatorsuaq demokratii atorsimassanngilaq, taakkunanimi isumaqatiginninniarnerit annertuut (minnerunngitsumik aningaasanut inatsit pillugu), naalakkersuisuni suliassaqarfiusumut ministerinit ingerlanneqartarnerat pissuserisartagaavoq.

Qangami assersuutigalugu danskit aningaasaqarnermut ministeriat isumaqatiginninniarfimmit partiit oqaaseqartartuinit, isumaqatigiissummik atsiueqataasunik ilaqarluni anillattoq takusimanngilaat. Taakkunanimi isumaqatigiissut qaqutiguunngitsukkut pingajussaannik oqaluuserineqarnera sioqqutingaarlugu atsiorneqarajuttarpoq.

Naggasiutigalugu ilanngutissavara ”Demokratiit (pimoorussamik) atorunnaarsinneqassasoq” naalakkersuisoqatigiillutik amerlanerussutillit ukiumut aningaasanut inatsimmut isummamittut pingaaruteqartigisumik isumaqatigiissuteqarnerminnik tamanut saqqummiussaqarsinnaassanngippata. Tassungalu atatillugu 2016-imut aningaasanut inatsisissamut isumaqatiginninniarnerit taamatut demokratiimik anersaalimmi pisussaanerat Sermitsiamut ilisimatitsissutigissavara.

Inussiarnersumik inuulluaqqusillunga

Anda Uldum, Aningaasaqarnermut Aatsitassanullu Naalakkersuisoq

 

 

 

 

Annertunerusunik paasisaqarusukkuiut saaffigiuk: Martin Christiansen, mobil: +299 221533