Peqatigiigitsi pujortarnerlu pinaveersaartissiuk

Inersimasut pujortartut amerlanerit kissaatigissagaluarpaat pujortalinngisaannarsimas­saga­lu­arlutik. Meerartavut inuusuttortavullu pujortalinnginnissaannut ikiortigit! Inersimasunut kajumissaarut taamatut nipeqarpoq, sapaatip akunnera pujortarfiun­ngitsoq pingajussaaneerneqalerpat. Angajoqqaanut siunnersuut imatut nipeqarpoq: Meeqqat najortaarneratigut peqqissumik inuusaatsimut pujortannginnikkullu tapersersoruk.

-”Inuusuttut pujortartut ikiliartorput, suliniutigerusupparalu ikiliartornerat ingerlaannas­sa­soq, 14-nik ukiullit 75 %-ii pujortartuunngillat. Tapersersorlugillu qiimmassassavavut pujortartalinngisaannarniassammata,” Peqqissutsimut Naalakkersuisoq Martha Lund Olsen oqarpoq, nangillunilu:

-”Sapaatip akunnera 22-mi oqariartuut amerlanerpaanut anngukkusupparput, tassalu angajoqqaat inersimasullu allat qanoq pingaaruteqartigisut meeqqat inuusuttullu peqqissumik inuussappata. Meeqqavit peqatigineratigut, oqaloqatigineratigut qiimmassarneratigullu peqqinnartumillu sammisaqarnerani meeqqavit peqqissumik pujortarfiunngitsumillu inuuneqalernissaanut aalajangiinissaanut tapersersussavat.”

-”Pingaaruteqarpoq, inersimasuusugut ataatsimoorluta qulakkiissallugu meeqqat inuusuttullu pujortartarneq ulluinnarni nalinginnaasutut isigissanngikkaat. Taamatut iliorsinnaavugut meeqqat inuusuttullu pujortartarneq pillugu ilaatigut oqaloqatiginerisigut, meeqqat eqqaanni pujortannginnikkut aammalu meeqqat inuusuttullu 18-nit ataallugit ukiulinnut tupat tigoriaannaannginnissaa isumagalugu.”

Pujortarnerup pinaveersaartinniarnera qulequtaralugu sapaatip akunnera 22-mi najukkami aaqqissuussisoqassaaq. Peqqissutsimut Naalakkersuisoqarfik tassunga atatillugu imerfik ”peqatigiinnermik” oqariartuutilik sanatissimavaa, taannalu kommunini pinaveersaartitsinermi siunnersortinut nassiunneqarnikuuvoq. Imerfiit meeqqat ilagalugit qaqqaliarnermut timersuutinullu allanut tulluarsagaapput.

Pujortaruit, sapaatip akunneralu 22 pujortarunnaarnissannut atorluarniarukku sms-ikkut akeqanngitsumik kiffartuussivik Pujortassaarit! peqqik.gl aqqutigalugu nalunaarsin­naa­vutit. Marsi qaammat pujortarunnaartitsiniarnermut siunnersortit 24-it nunatsinni tamanit peqataasut ilinniartinneqarput, Illoqarfigisanni pinaveersaartitsinermut siunnersortimu­karsin­naavutit, tassani pujortarunnaarnissamut pikkorissartitsinerit suut periarfissaanersut paasiniarsinnaavatit.

Sapaatip akunnera 22 pillugu www.peqqik.gl –mi atuarnerusinnaavat.

Paasissutissat amerlanerit peqqissutsikkut siunnersortimut Nadja Frederiksen oqarasuaat +2969 34 66 76 imal. E-mail nafr@nanoq.gl –mi pissarsiarineqarsinnaapput