Isumaqatigiinneq annertooq

Kommuneqarfik Sermersooq-mi silaannakkut attaveqaqatigiinnerup ineriartortinneqarnissaa pillugu isumaqatigiinneq annertooq

Kommuneqarfik Sermersooq-mi Borgmesteri, Asii Chemnitz Narup aammalu Ineqarnermut, Sanaartornermut Attaveqaqatigiinnermullu Naalakkersuisoq ullumi pingasunngornermi 20. maj 2015 pitsaasumik iluatsilluartumillu ataatsimeeqatigiipput, tassani pingaartumik eqqartorneqarluni Nuummi mittarfiup tallineqarnissaa.

Knud Kristiansen Asii Chemnitz Narup-imut erseqqissaateqarpoq iliuusissatut poortukkat pingasuusut immikkoortortai tamarmik pingaaruteqartut, taamaattorli Nuummi Ilulissanilu mittarfiit tallineqarnissaat Naalakkersuisut pingaarnersiuineranni qaffasissumik inissisimasut, taakku aamma suliaralugit aallarteriaannaanerat innersuussutigalugu, tamannalu Asii Chemnitz Narup-ip naammagisimaarpaa, illuatungeriillu isumaqatigiissutigaat Nuummi mittarfiup tallineqarnissaanut nivariarneq siulleq piaartumik kinguarsaanertaqanngitsumillu pissasoq tamarmik kissaatigigitsik.

Iliuusissatut poortukkat pingasut pineqartut timitalersorneqarnissaat pillugu Naalakkersuisut tigussaasunngorlugit takorluugaat Knud Kristiansen-ip Asii Chemnitz Narup-imut saqqummiuppai, matumani aamma Nuummi mittarfiup 1799 meterinngorlugu atlantiku ikaarlugu mittarfittut atorneqartussanngorlugu tallineqarnissaa aammalu tallineqarneranut atatillugu atortulersuutit naleqqussarneqarnissaat nutaamillu utaqqisarfiliortoqarnissaa ilanngullugit, Asii Chemnitz Narup-ip saqqummiuppaa talliliisoqarnissaanut atatillugu Kommune mittarfiup tungaanut aqqusinermik naleqqussaanissaminut pilersaarusiuleruttortoq aammalu minnerunngitsumik nunatsinni illoqarfiit pingaarnersaanni inuussutissarsiornermik ingerlataqartut oqaloqatigilluarneqalereersut.

- Innuttaasut, inuussutissarsiornermik ingerlataqartut aammalu nunatta illoqarfiisa pingaarnersaanni takornarissanut tikilluaqqusissallutik piareersimajumaartussat pisinnaatitaaffigalugulu pisariaqartippaat tusassallugu Nuummi mittarfiup tallineqarnissaanut pilersaarutit tigussaasut aammalu piffissalersuineq pillugu erseqqissumik ilisimatinneqassallutik, aammalu ataatsimeeqatigiinnerput aallaavigalugu tikkuarusupparput isumarput naapertorlugu ukiut ingerlanerini misissuinerpassuit, nalunaarusiarpassuit inassuteqaaterpassuillu naammalersut. Kissaatigaarput Inatsisartut piaartumik ataatsimoorluta anguniakkavut ilalerlugit erseqqissuliussasut, tassalu Nunatta illoqarfiisa pingaarnersaanni mittarfiup tallineqarnissaata sapinngisamik piaarnerpaamik aallartinneqarnissaa qulakkeerneqaqqullugu, Asii Chemnitz Narup aamma Knud Kristiansen ataatsimoorlutik Inatsisartunut kaammattuipput.

Asii Chemnitz Narup-ip ilanngullugu oqaatigaa Inatsisartut tungaannit pisariaqanngitsumik kinguarsaasoqassappat, taava tamatuma malitsigisaanik Kommune suliniummik tigusissalluni piareersimasoq.

Nuummi mittarfiup tallineqarnissaanik pilersaarutit saniatigut, Knud Kristiansen-ip ilanngullugit saqqummiuppai Nerlerit Inaanni (Konstabel Pynt) mittarfiup atorunnaarsinneqarnissaanik paarlattuanillu Ittoqqortoormiit qanittuani Uunartip eqqaani mittarfiliornissamik pilersaarutit aammalu Tasiilap eqqaani mittarfiliornissamik pilersaarutit saqqummiunneqarlutik.
Pilersaarut kingulliullugu taaneqartoq Nuummi mittarfiup tallineqarnissaanut aammalu Ittoqqortoormiini mittarfiup illoqarfimmut qaninnerusunngorlugu nuunneqarnissaanut pilersaarummut sanilliullugu piffissaq sivisunerusoq atorlugu naammassiniagassaavoq.

- Assut nuannaarutigaara Kommuneqarfik Sermersooq-mi borgmesterip pilersaarutitsinnut ilaliinera, ataatsimeeqatigiinnerup malitsigisaanik Inatsisartut ukiakkut 2015-mi ataatsimiinneranni aalajangiiffigisassatut siunnersuutissama pingasuusut ilusilersorneqarneranut ersarissumik najoqqutassaqartilerpaanga, Ineqarnermut, Sanaartornermut Attaveqaqatigiinnermullu Naalakkersuisoq oqarpoq.

Piffissap imaalinerani Knud Kristiansen-ip Kommune Kujalleq-mi, Qaasuitsup Kommuniani aammalu Kommuneqarfik Sermersooq-mi Borgmesterit ataatsimeeqatigisimalereerpai massakkullu sulissutigalugu Qeqqata Kommuniani Borgmesterip, Hermann Berthelsen-ip ataatsimeeqatiginissaa.

Itinerusumik paasisaqarusunnermi attavissat:

Borgmesterip allattaa Konkordie Gabriel 367004 kosg@sermersooq.gl

Naalakkersuisup allattaa Jensine Berthelsen 345450/562303 jebe@nanoq.gl