Naligiissitaanermut Ulloq

Ulloq 20. maj tassaavoq Nunatsinni Naligiissitaanermut Ulloq

”Ulloq 20. maj atorluarneqassaaq naligiissitaanerup aqqani nalilersuiffigissallugu aammalu ilumut naligiissitaanersugut oqallisigissallutigu. Nunatsinni Naligiissitaanermut Siunnersuisoqatigiit pilerseqqammerpagut. Naalagaaffiit Peqatigiit (FN-p) ataani CEDAW-mi isumaqatigiissut pillugu siunnersuisoqatigiiffimmi soraarummeersinneqaqqammerpugut, tamatumali saniatigut arnat ulluat 8. marts nalliussereernikuullutigu.

Siunissamut qiviarutta taava Naligiissitaanermut Siunnersuisooqatigiit mikinngitsumik suliariniagaat pillugit isumalluarfigaagut. Junip qaammataani – Danmarki suleqatigalugu – Nunat Avannarliit suleqatigiiffiata ataani naligiissitaaneq pillugu Nuummi isusioqatigiissitsissaagut”, taamatut oqaaseqarpoq Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen.

Nunarput CEDAW-imi isumasioqatigiinnit nersorniarneqarpoq ilaatigut naligiissitaanermut inatsit nutaaq pillugu. Taanna 2013-mi akuersissutigineqarnikuuvoq, tamatumali saniatigut arnat politikkikkut sulinermi akuulluarput, inuussutissarsiornermi inuiaqatigiillu nalinginnaasumik ingerlanneqarneranni, tamatumani ilanngullugit ilinniartitaanermi suliffeqarnerullu iluani peqataalluarlutik.

Iluatsissimasagut uniffigiinnassanngilagut. Soorunalimi naligiissitaanerup iluani suli unammilligassaqarlutali pitsanngorsagassatsinnik peqarpugut, soorlu akunnitsinni ingammik angutit arnallu akornanni annersaasoqartarnerata annikillisarniarnerani.

”Taamaattumik piffissami qaninnermi Naalakkersuisooqatikka qanimut suleqatigalugit periusissanik ilusilersuisariaqarpugut, tamatumanilu ilaatigut CEDAW-imi isumasioqatigiinnit tikkuarneqartut sulissutiginissaani aqqutissarsiornermi. Tamatumani kikkulluunniit suleqataanissaminnut tikilluaqqusaapput”, taamatut oqarpoq Martha Lund Olsen.

Naligiissitaaneq kisiat tassaanngilaq arnat inuiaqatigiinni naligiissitaanissaanut apeqqut. Angutit amerlaqisut ineriartornermi katataasarput aammalu inuiaqatigiit suiaassutsikkut oqimaaqatigiissumik ingerlaaseqarnissaanut akornutaasarluni. Tamakkorpiaat sammineqassapput Nunat Avannarliit isumasioqatigiissitsineranni ”Suiaassuseq, Ilinniartitaaneq Innuttaasullu nuttarnerat” qulequtaralugit sammineqarniarput.

Isumasioqatigiinneq Nuummi junip 17-ani ingerlanneqassaaq, peqataasussallu tassaallutik Nunanit Avannarlerni aallartitarpaalussuit nunatsinniillu soqusallit sinniisaat. Danmarkimi Meeqqanut, Naligiissitaanermut, Nunasisunut Isumaginninnermullu tunngasunut Ministeriaqarfik tamatumani qanimut suleqatigineqassaaq. Isumasioqatigiinnermi ”periusissat pitsaanerpaat” – tassalu misilittakkat eqqarsaatigalugit kikkut tamarmik peqataaffigisinnaasaanik siunissami suliniuteqartarnissani periuserineqarsinnaasut nassaarineqarniassallutik.

”Qilanaaraara tusarnaassallugit saqqummiunneqartussarpassuit tusarnaassallugit, isumassarsiorfigissallugit siunissamilu nunaqarfinni illoqarfinnilu sulinissatsinni angutit arnallu pitsaanerpaanik sinaakkuteqarluta suliniuteqarnissatta aqqutissiuuneqarneranni”, taamatut oqarpoq Ilaqutariinnernut, Naligiissitaanernut Isumaginninnermullu Naalakkersuisoq Martha Lund Olsen.

Suli annertunerusumik paasisaqarniaruit uunga saaffiginnissuteqarsinnaavutit: Kirsten Olesen, kiol@nanoq.gl – tlf. 553252