Aalisarsinnaanermut akuersissuteqartut amerleriartut

Nunatsinni aalisarsinnaanermut akuersissuteqalersut ukiuni kingullerni marlunni malunnaatilimmik amerlerariarput, aalisariutaatillit umiatsiaararsortullu aalisarsinnaanermut akuersissutaatillit 2011-imi 2.200-riarlutik ukioq manna 2.800-upput. Amerleriaataat 600-ullutik.

Nunatta immikkoortuani 46-mi taaneqartumi, nunarput tamarmi, sumiiffilli Qasigiannguaniit Kullorsuarmut pinnagu, qaleralinniarnissamut  tamaani akuersissutaatillit ukiuni kingullerni amerleriarnerpaapput, ukiut marluk  matuma siorna 340-usut ukioq manna 634-ullutik. 294-nik amerleriarlutik. Qaleralinniarsinnaanermut akuersissutit pineqartut tassaapput aalisariutinik umiatsiaaqqanillu piginnittunut akuersissutit.

Aqutsiveqarfinni Qeqertarsuup Tunuani, Uummannaq aamma Upernavimmi, summiffimmi 46-mik pineqartartumi akuersissutaatillit ukiuni kingullerni marlunni amerleriarput. Umiatsiaararsortut qaleralinniarsinnaanermut akuersissutaatillit ukiut marluk matuma siorna 789-upput ukioq manna 812-ullutik. 23-nik amerleriarlutik.

Nunatsinni aalisariutaatillit umiatsiaaraatillillu saarullinnik aalisarsinnaanerminnut akuersissutaatillit ukiut marluk matuma siorna 1.071-iusut ukioq manna 1.354-upput – 283-inik amerleriarsimallutik.

Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq:

- Nuna tamakkerlugu naalakkersuinermik suliallit ilaat partiillumi piffissami kingullermi oqaluttaraluarput aalisarsinnaanermut akuersissutit ikilisassallugit politikkeqartugut. Erseqqissaasarlutillu aalisarnermut akuersissutit ukiuni kingullerni ikileriarsimasorujussuit.

- Taamaaqqajanngilarli. Killormorluinnarmi pisoqarpoq, aalisarsinnaanermut akuersissutaatillit ukiuni kingullerni amerleriarmata. Tamanna  Aalisarnermut, Piniarnermut Nunalerinermullu Naalakkersuisoqarfiup apriilip naalernerani kisitsisaataasa erseqqilluinnartumik takutippaat, Karl-Kristian Kruse oqarpoq.

- Amerleriarneri nuannaarutigilluinnarpara, tamanna aalisarnermut politikkitta tunngavigilluinnarmagu, Naalakkersuisuni ilaasortaq oqarpoq, erseqqissaallunilu Naalakkersuisooqatigiit anguniarmassuk aalisarnermut akuersissutit suli amerlanerit tunniunneqartarnissaat.

Naalakkersuisooqatigiinnissamut isumaqatigiissut naapertorlugu piniarsinnaanermut allagartat aalisarsinnaanermullu akuersissutit kommuninit siunissami isumagineqalertussaapput.

Attavigineqarsinnaasoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. E-mail: jio@nanoq.gl