Kruse Sermitsiaq.AG-mut: Uniorujussuarpat

- Erseqqissarusulluinnarpara ukioq manna avaleraasartoortassat agguaanneqarnissaasa suliarinerini suliamut attuumassuteqarsimanngilluinnarama, Aalisarnermut, Piniarnermut Nunalerinermullu Naalakkersuisoq, Karl-Krisitian Kruse oqarpoq.

- Taamaattumik agguaassinissaq Naalakkersuisut siulittaasuannut suliassanngortippara, siulittaasullu kissaatigivaa Naalakkersuisooqataasut allat peqatigalugit agguaassineq aalajangersaaffigineqassasoq.

Sermitsiaq.AG sisamanngornermi maajip 21-anni 2015 ukioq manna avaleraasartoortassat agguaannerinut atatillugu ilaatigut allappoq Karl-Kristian Kruse KNT-mut ukiup aallartissimalerneranut allaat piginnittutut nalunaarsimasuunerarlugu.

Tusagassiortup tamanna uppernarsiniarlugu kissaatigisimappagu uannut saaffiginnissinnaasimagaluarpoq. KNT-mut maannakkut attuumassuteqarnera aamma nassuiaassutigisinnaasimassagaluarpara. Tusagassiortulluunniit Inatsisartut nittartagaanni tatigisaalluni qinigaaffimmi aamma inuussutissarsiorluni sulerisimaneranik paasissutissani paasiniaasinnaasimassagaluarpoq.

Tusagassiortorli illuinnaasiortumik inuttarsiuillunilu saqqummiussaqarpoq, uanga Naalakkersuisullu soqutigisatsinnik salliutitsinerarluta.

- Tamanna eqqoqqissaanngilaq. KNT-iimmi eqqartuussissuserisua decembarimili 2014-imi ilisimatitsivoq KNT-ip siulersuisuini ilaasortaajunnaartunga, tamanna piginneqatigiiffiup decembarip 9-anni 2014 ataatsimeersuarnerani ilisimatitsissutigineqarluni, Karl-Kristian Kruse oqarpoq.

Piginneqataasimaninnut paasissutissat ingerlatseqatigiiffiup eqqartuussisorisuata erninnut ingerlateqqippai. Paasissutissat Inatsisartut qinigaanerup misilinneqarnissaanut ataatsimiititaliamut aamma Inatsisartut siulittaasoqarfianut nassiunneqarsimapput.

Naalakkersuisuni ilaasortaq isumaqarpoq Sermitsiaq.AG eqqunngilluinnartumik allaaserisaqartoq, allalluni avaleraasartuut agguaanneqarnerisa suliarineqarnerini Naalakkersuisuunini atornerlullugu sunniiniarsimasuunerarlugu, atorfini imminut iluaqutissarsiorfigalugulu iluanaarniutiginerarlugu.

- Taamaattumik Sermitsiaq.AG-ip uannut pasilliilluni allaatigisani tunuartilluinnartariaqarpaa, Karl-Kristian Kruse oqarpoq, Inatsisartullu pisortat ingerlatsineranni suliassat suliarineqartarnerat pillugu inatsisaat innersuussutigalugu, ilaatigut ima allassimalluni: Kinaluunniit pisortatigut ingerlatsinermi suliaqartoq suliassami aalajangersimasumi peqataasinnaanngilaq, taassuma aapparisaa, eqqarlia imaluunniit aappariinnnikkut siulimigut kinguaamigulluunniit siulimiluunniit qatanngutaasigut imaluunniit allatigut qanitaasigut qanitsigisumik qanigisarinnittuusoq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnittuuppat imaluunniit kimut taamatut soqutiginnittumut sinniisuuppat.

- Taamaattumik pissutissaqavillunga avaleraasartoortassat agguaanneqalermata aalajangeeqataanngilanga, Karl-Kristian Kruse erseqqissaavoq.

Aamma isumaqarpunga Naalakkersuisut avaleraasartoortassanik agguaassinissamut tunngavigineqartussat, ukioq manna apriilimi aalajangersaaffigineqartut, naapertorlugit agguaassisimasut.

Tamanna eqqumiiginartutut isigisassaanngilaq. Qinnuteqartummi qinnuteqarfissaq killissarititaasoq nallertinnagu nassiussisimasut tamarmik nalilersuiffigineqartarput innersuunneqartarlutillu, uppernarsaatit piumasarineqartut naapertorlugit pisassinneqartussatut tulleriaarneqartarlutik.

Attavigineqarsinnaasoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl