Eqqumiigaara

Eqqumiigaara,  aviisimi AG-mi 13. maj 2015 atuarsinnaagakku ”KNR 5 milliuuninik annaasaqassaaq”.

Allaaserisami pineqarpoq Radiukkut TV-iikkullu aallakaatitsisarneq pillugu inatsisip allanngortinneqarnissaa, Naalakkersuisunit aalajangerneqartutut UKA2015 -imi saqqummiunneqartussaq, akuersissutigineqassagunilu  isumaqassalluni KNR 1. januar 2016 aallarnerfigalugu KNR pilerisaarutinik aallakaatitsisinnaajunnaassasoq.

Allaaserisap qulequtaa naapertorlugu aningaasarparujussuupput KNR-ip pilerisaarutitigut isertissimasai, taamaattoqarsimagaluarpallumi qujanarsimassangaluarpoq! Ajoraluartumilli pissusiviusut taamak pitsaatiginngillat. 2013-imi ukiumoortumik KNR-ip naatsorsuutai naapertorlugit 1,8 mio. kr.-it pilerisaarutitigut isertinneqarput, 2014-imilu 2,3 mio. kr.-it isertinneqarlutik, - kisianni taakkunannga ingerlatsinermut aningaasartuutit ilanngaatigineqassapput, - aammalu puigornagu suliniut annertooq pisortaasut siulersuisuusullu nutaanik anguniagassalertarnerminnut atortarsimasaat, pilerisaarutinit isertinneqarsinnaasut annertusarniarlugit

Kiisalu inatsisissatut siunnersuummi taamaallaat pineqarpoq KNR pilerisaarutinik aallakaatitsisinnaajunnaassasoq. – Taamaasillunilu KNR-imut suli periarfissaassaaq pilluaqqussutinik aallakaatitsineq, - akiliillunilu aallakaatitassaqarneq.

Aamma eqqumiigaara AG-ip allaaserisaani ingerlaqqilluni allassimammat ”Naalakkersuinermik suliaqartut aalajangerpaat KNR ussassaarutitigut isertiaqarsinnaassanngitsoq.”

Tassanilu pissusiviusut tassaapput, oqallittoqarmat KNR pilerisaarutinik aallakaatitsisassanersoq aallakaatitsisassannginnersorluunniit, oqallinnerlu taanna ukiorparujussuarni ingerlasimalluni, aviisillu nuna tamakkerlugu saqqummersartut marluk maannamut tunngavilersuutigisarsimavaat tusagassiorfiit pisortanit aningaasalersorneqartut, aamma tusagassiorfiit pilerisaarutit aqqutigalugit aningaasalersorneqartartut immikkoortittariaqartut. Taamaattumik avissaartitsinerup taama ittup kingunerisinnaavaa KNR-ip aningaasat annaasai tusagassiutinut tapiissutiniit matussutissarsineqarnerat, pilerisaarutinik tuniniaanissamut periarfissaalersussat isiginiarlugit, KNR niuernermi tassani peqataajunnaarpat. Inatsisip allannguutissaa akuersissutigineqassappat aningaasalersuinissaq aaqqitassaassaaq, tassani tusagassiutinut tapiissutit, - tassanilu immaqa taakkua ilaat, - periarfissatut eqqartorneqarnikuuvoq.

Kiisalu eqqumiigaara, aviisit pilerisaarutinik annertunerusunik tunisaqartalernissamut periarfissaalersussaq ernumanartoqartilermassuk.

Ataqqivara aviisit imminnut illersorlutik ilungersormata, tamanna ajunngilaq. Taamaattuminguna maannamut ikkarluit anigortarsimagisi, naapeqatigerusuppassilu aningaasaqarnikkut siunissamut isumaliutersuutisi pillugit, aammali tamatumunnga atatillugu qilanaaraara tusagaqarfigissallugu qanoq ittunik siunissami pilerisaarutinik niueruteqarnermut periarfissat nutaat atuutilersussat iluaqutiginiarnerisi tusagaqarfigissallugu, Radio-kkut Tv-iikkullu aallakaatitsisarnermut inatsit ukiamut ataatsimiinnermi akuersissutigineqassappat.

 

Inussiarnersumik inuulluaqqusillunga

Nivi Olsen 

Annertunerusunik paasisaqarniaraanni Naalakkersuisup allattaa Jens-Frederik Nielsen attavigineqarsinnaavoq, aqqutigalugu email: jfni@nanoq.gl aamma oqarasuaat +299 560299.