Utoqqalinermi pensionisat

Utoqqalinermi pensionisat siunissamut qularnaarinninnerullutillu isumaginninnikkut oqimaaqatigiittut tamanut iluaqusiissapput

”Naalakkersuisut qitiutillugu politikkikkut suliassaanut ilaavoq qulakkeerniassallugu nunatsinni utoqqartatta naamaginartumik inuuniarnerminni atugaqarnissaat. Pingaaruteqarpoq qulakkeerniassallugu nunatsinni utoqqaat naamaginartumik atugarlioratillu inuuneqarsinnaanissaat, taamaasillunilu pinngitsoorniarneqassalluni piitsunik utoqqaqartoqarsinnaanissaa. Ilanngullugu pingaaruteqarpoq qulakkeerniassallugu utoqqalinermi atugarisat siornatigut suliffeqarluni inuunermut sanilliullugu appasinneruallaannginnissaat. Tamatsinnummi pingaaruteqarpoq aqqutissiuutissallugu utoqqartagut inuunerminni ilungersorlutik inuusimasut uagullu pilluarluta inuusinnaalernissatsinnut sulinermikkut aqqutissiuussisimasut utoqqalinerminni toqqissillutik inuuinnarsinnaanissaat – aamma aningaasaqarniarnikkut atugarisat eqqarsaatigalugit. Tamakkorpiaat tunngavigalugit Naalakkersuisut qulakkeerniarusuppaat pensionisiallit akornanni pissakillutik inuusut pitsaanerusumik atugaqalernissamut aqqutissiuuneqarnissaat.

Pensionisiaqartitsisarneq eqqarsaatigalugu siunissami unammilligassagut annikinngeqaat. Taamaattumik piffissap sivikitsup ingerlanerani iliuuseqartariaqarpugut. Tamanna siunertaralugu utoqqalinermi pensionisiassat pillugit aaqqissuusseqqinnermi toqqammavigisagut saqqummiunniarpagut. Taakkua ukiuni amerlasuuni isumaginninnikkut aningaasaqarniarnikkullu oqimaaqatigiissumik ilusilerlugit piareersarsimagatsigit”, taamatut oqaaseqarpoq Ilaqutariinnermut Naalakkersuisoq Martha Lund Olsen

Aaqqissuusseqqinnermi tunngaviusut tassaapput - utoqqalinissamut katersisarnerup imminut akilersinnaasunngortinnissaa – utoqqaat pisinnaasut suliffeqarallaannarnissamut periarfissinneqartassasut aammalu taamaasiornermikkut aningaasaqarniarnerminni iluaquserneqartassasut – taamatullu utoqqaat taamatut kissaateqartut sapinngitsullu angerlarsimaffigisaminni inuuginnarnissamut periarfissinneqartassasut. Tamakku saniatigut pingaaruteqarpoq aqqutissiuutissallugu, utoqqasaanngulersut sapinngisamik ukiuni arlaqarnerusuni suliffeqarlutik imminnut napatissinnaasarnissaat.

Utoqqalinermi pensionisiaasartut pillugit siunnersuut ullumi tusarniaassutigineqarluni soqutigisaqartunut nassiussuuneqartumi takuneqarsinnaavoq kikkulluunniit tunngaviusumik pensionisiaqartinneqartarnissaat aqqutissiuuniarneqartoq. Taanna aapparisap qanoq isertitaqarneranik sunniuteqarfigineqartassanngilaq aammalu utoqqaat pissaginnerusut neqeroorfigineqartassasut pensionisiaminnut tapisiaqartinneqartarnissamut. Tamatuma saniatigut utoqqaat pensionisiaqartut innarluuteqanngikkunik peqqiilliulersimasut, periarfissaqassapput immikkut pisariaqartitaminnut ikiorserneqartassallutik inuttullu tapisiaqartinneqartassallutik. Taakkua taaneqartut saniatigut angerlarsimaffigisami ikiorteqartarneq akeqarunnaassaaq, taamaasiornikkullu aqqutissiuuneqartassaaq sapinngisamik piffissami sivisunerpaami nammineq angerlarsimaffigisami najugaqaanarsinnaasarnissaq.

”Politikkikkut anguniakkat tamakkiisumik isigalugit utoqqalinermi pensionisiaqartitsisarneq nutaaq pilersikkusunneqarpoq, isumaginninnikkut aningaasatigullu imminut oqimaaqatigiissutut taaneqarsinnaasoq. Inatsisissatut siunnersuut Inatsisartut 2015-mi ukiakkut ataatsimiinnissaanut Naalakkersuisut saqqummiutissallugu siunniussimavaat.