Naalakkersuisut angerlarsimaffiup avataanut inissiisarneq pinaveersaartinniarpaat

Ilaqutariinnik isumasiueqatigiisitsineq periutsit ilaattut atorlugu

Ullumikkut meeqqat inuusuttuaqqallu angerlarsimaffiup avataanut inissinneqartartut amerlasuut takusarpavut. Inissiinerit tamarmik meeqqap ineriartorneranut ilaqutaasunuttaaq annertuumik sunniuteqartarput. Ilaqutariinnik isumasiueqatigiisitsisarnermi misilittakkat takutippaat, ilaqutariinnut siusissukkut suliniuteqartarnikkut angerlarsimaffiup avataanut inissiisarnerit pinaveersaartinneqarsinnaasut.

Ilaqutariit amerlasuut pisariaqartippaat nukissat isiginiarneqarnissaat sanngiiffiit pinnagit. Tassunga periutsit ilagivaat ilaqutariinnik isumasiueqatigiisitsineq, kommunillu ilaqutariinnik sullissinerat nukittorsarniarlugu, naalakkersuisoqarfik isumasioqatigiisitsisimavoq kiisalu Ataqatigiissaarisutut aamma Suliniuteqartartut pikkorissartitsisimalluni, ilaqutariinnik isumasiueqatigiisitsinermi sullissinermi periutsit ilagisaannik.

Pikkorissartitsinerit ilaqutariinnik isumasiueqatigiisitsinerup iluani periutsinik tassalu, Ataqatigiissaarisutut Suliniuteqartatututullu ilinniarnermik imaqarput, nunatsinnit qallunaallu nunaanni misilittakkanik ilaqarlutik aammattaaq Kommuneqarfik Sermersuummi misilittakkat ilanngullugit. Peqataasut sungiusarnikkut ilaqutariinnik isumasiueqatigiisitsineq qanoq piviusumik atorneqartarnersoq misilittagaqalerput.

Ataqatigiissaarisutut Ilulissani peqataasut katillugit 28-iupput, Suliniuteqartartutut Sisimiuni peqataasut 22-viullutik. Nunatsinni illoqarfiit amerlanerit pikkorissaasoqarnermi peqataasoqarput. Inunnik isumaginnittoqarfinniit, ilaqutariinnut sullissivinniit, atuarfeqarfinniit kiisalu ulluunerani paaqqinnittarfinneersut peqataapput.

Ilaqutariinnik isumasiueqatigiitsitsisarneq New Zealandimi ineriartortinneqarsimavoq.

Annertunerusumik paasisaqarusukkuit Ministersekretær Sina M. Kristiansen attavigineqarsinnaavoq tlf. 346949, mob. 539371 E-mail: nimk@nanoq.gl