Kinguaassiuutitigut atornerlunneqarnermit kingunipiluutit pillugit isumasioqatigiinneq

Nunani Avannarlerni Ministerit Siunnersuisoqatigiivini Danmarkip siulittaasuuffeqarneranut atatillugu Danmarkimi Ministeriet for Børn, Ligestilling, Integration og Sociale Forhold aamma Socialstyrelsen kiisalu Ilaqutariinnermut, Naligiissitaanermut Isumaginninnermullu Naalakkersuisoqarfik kinguaassiuutitigut atornerluineq pillugu Ilulissani 29. aamma 30. maj 2015 isumasioqatigiissitsipput.

Isumasioqatigiinnerup imarerpiarpaa inersimasut meeraanerminni kinguaassiuutitigut atornerlunneqarsimanerminnit kingunerlutsitsisut. Nunani Avannarlerni ilisimasallit assigiignngitsut ilisimasatik misilittakkatillu saqqummiuppaat, siunertarineqarluni kingunerlutsitsineq pillugu ilisimasat qaffassarnissaat Nunallu Avannarliit akornanni ilisimasanik misilittakkanillu tunioraateqatigiilernissaq siunertaralugu attaveqaqatigiilernissaq. Ilisimasallit saniatigut atorfilittat isumasioqatigiinnermut peqataapput

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen tikilluaqqusilluni oqalugiarami ima oqarpoq:

“Nunani Avannarlerni isumasioqatigiisitsinikkut inersimasut kingunerlutsitsisut taakkununngalu pingaarutilimmik sullissineq ersarissarneqarpoq. Taamaammat isumasioqatigiilluartoqarnissaa qilanaarivara, ilisimasanik tunioraateqatigiinneq, nunat killeqarfii akimorlugit attaveqaqatigiinneq suleqatigiinnerlu pingaartinneqassallutik. Isumaqarpungami tamatta ilisimasaqartugut tunniussinnaasatsinnik, taamaalilluta inunnik kingunerlutsitsisunik ataatsimoorluta ikiuisinnaassalluta, taamalu kinguaassiuutitigut atornerluinermik ataatsimoorluta akiuiniassalluta!” 

Nunani Avannarlerni Danmarkimit, Sverigemit, Norgemit, Finlandimit, Islandimit, Savalimmiunit Nunatsinniillu peqataasut 43-uupput. Naalakkersuisoqarfimmiit pingasuut peqataapput tarnillu pissusaanik ilisimasallit Angalaqatigiittartuneersut pingasut.

Isumasioqatigiinnermi atortut atorneqartut Socialministeriap/Socialstyrelsip aamma naalakkersuisut nittartagaannut iliorarneqarumaarput.

Paasisaqarnerorusuttut attavigisinnaavaat Ivalu Nørreslet oqarasuaat +299 346034 imaluunniit e-mail ivno@nanoq.gl.