Tele Greenland maajip 27-iani ataatsimeersuarpoq

2014-imi oqarasuaatit angallattakkanut, internet- aamma paasissutissanik nassitsisarnermi Tele Greenlandip akinik annertuumik appartitsisimavoq. Akinik appaaneq ukiumi angusaasunut pitsaanngitsumik kinguneqarsimavoq, sinneqartoorutimmi akileraarutissat ilanngaatigereerlugit 46,5 mio. kr.-iummata, taakkulu ukiumi naatsorsuusiorfiusumi 2013-imi angusanit annikinnerungaatsiarput, ukiumimi tassani akileraarutissat ilanngaatigereerlugit angusat 64,0 mio. kr.-iummata. Ataatsimeersuarnermi piginnittut agguagarsiassaasa 32 mio. kr.-iunissaat akuersissutigineqarpoq. 2014-imi upernaakkut akit malunnartumik appariartinneratigut oqarasuaatinik angallattakkanik atuineq qaammatit tallimat ingerlanerinnaanni marloriaatinngortinneqarpoq.

Naalakkersuisut nuannaarutigaat ingerlatseqatigiiffiup mellembølge atorlugu nassitsissutinik pilersitseqqinniarnera, taamaasillutimmi innuttaasut radiomik tusarnaarnissaminnut periarfissinneqassammata.

Naalakkersuisut Siulittaasuata Kim Kielsenip ataatsimeersuarnermi oqaatigaa internet-imik atuinerup annertuseriarnera malugineqartoq aqqutigalugu immap naqqatigut kabel-ip innuttaasunut iluaqutissanngorlugu tallineqarnissaata pingaaruteqassusaanut tunngaviliisoq.

Agner Mark aamma Søren Voigt ukiuni tallimani sulereerlutik nalunaarutigaat siulersuisuni ingerlaqqinniaratik, Naalakkersuisunillu ukiuni tallimani annertuumik suleqataasimanerinut qujassuteqarfigaagut. Pineqartut siulersuisuni tunuarnerisa kingunerisaanik Naalakkersuisut aalajangerput siulersuisuni ilaasortat nutaaviit ivertinneqassasut, tassami Tele siunissami suli annertuunik unammilligassaqarpoq, ilaatigut immap naqqatigut kabel-ip tallineqarnissaa ingerlatseqatigiiffiullu namminersortunngorsarnissaa eqqarsaatigalugit. 

Siulersuisuni nutaani siulittaasunngorpoq Stine Bosse, siulersuisunilu ilaasortat sinneri tassaalerlutik Arctic Winter Games-imi massakkut direktøriusoq, Maliina Abelsen, eqqartuussissuserisutut suliffeqarfimmi Malling & Hansenimi eqqaartuussissuserisoq, Ulrik Blidorf, TDC Wholesalemi massakkut pisortaasoq, TDC-ip attaveqaataataanik Danmarkimi nunanilu allani tuniniaasartoq, Kim Søgård Kristensen.

Naalakkersuisut qularutiginngilaat Tele Greenlandimi siulersuisunngortut nutaat isiginneriaatsit nutaat atorlugit annertuumillu piginnaaneqarnermikkut ingerlatseqatigiiffiup ineriartorteqqinnissaanut suleqataalluarsinnaassasut. Ilutigitillugu siulersuisuni ilaasortaasimasut tamaasa suleqataalluarsimanerinik qujassuteqarfigaakka.

 

Paasisaqarnerorusuttut attavigisinnaavaat Ingerlatseqatigiiffinnut Allattoqarfimmi pisortaq Rasmus Pedersen, oqarasuaat +299 34 50 00 imaluunniit e-mail rasp@nanoq.gl.