NAKUUSA meeqqallu ukiuni suli tallimani ingerlaqqilerput

Isumaqatigiissut Naalakkersuisunit UNICEF Danmarkimillu akornanni pivoq , suliniutip NAKUUSAp ingerlannerata ukiunik tallimanik ilaneqarneranik sivitsuisumik. NAKUUSAp annertunerusumik anguniagaraa nunatsinni meeqqat atugarisaasa kiisalu pisinnaatitaaffiisa pitsanngorniarnissaat, tamannalu pissutsinut isiginninnermik allanngortitsinikkut anguniarneqartarpoq. Suliarlu tamanna ukiunik tallimanik tunineqarpoq 2020-ip naanerata tungaanut ingerlasussamik.

Ilaqutareeqarnermut, Naligiisitaanermut Isumaginninnermullu Naalakkersuioq Martha Lund Olsen, Ilinniartitaanermut, Piorsarsimassutsimut, Ilisimatusarnermut Ilageeqarnermullu Naalakkersuisoq Nivi Olsen kiisalu UNICEF Danmarkimi siulittaasoq Alfred Josefsen pingasunngormat Katuami kaffillernermik aaqqissuussipput Nuummi innuttaasunut NAKUUSAp suliniutigineqarnerata ilaqqinneranik persuarsiutiginnittumik.

NAKUUSA 2011-imi aallartinnerminiilli ulapputeqarsimavoq ullumikkullu innuttaasut tamagajammik NAKUUSAp suliaa ”Suli anaanamik, suli ataatamik!” ilisimavaat. NAKUUSAp aallartinnerminiilli meeqqat inuusuttullu inuiaqatigiinnit tusaaniarneqarnerulernissaat piviusunngortittarsimavaat, soorlu Meeqqat Isummersorfianik pilersitsisimanermikkut.

Aki-Mathilda Høegh-Dam suliniutip 2011-imi aallartinneqarneranilli peqataasimasoq imak oqaaseqarpoq:

Nuannaaqaanga NAKUUSA ukiunik suli tallimani nageqqimmat. Uannut peqataasimanera isumaqarteqaara pingaarteqalugulu, maannali aammattaaq takusinnaalersimavara sineriammi sammisassaqartitsisarsimanigut meeqqat pisinnaatitaaffii pillugit oqariartuutigut siammaassorluarsimallutigit. Uagut meeqqat NAKUUSA aqqutigalugu tusaaneqalersimavugut, tamannalu Kalaallit Nunaata siunissaanut pingaaruteqaqaaq.”

NAKUUSA ukiut tallimaarannguit iluinni isummanik allannguinissaq pingaarnertut suliarisimavaat, tamannalu nuna tamakkerlugu isiginnaagassianik naatsunik paasissutissiisunik suliaqarnermikkut ingerlassimavaat. Tamatumanilu meeqqat inuusuttuaqqallu suliat aallartinnerinniit naanera tikillugu peqataatinneqartarsimallutik. Suliat tupinnaannartumik innuttaasut 92-iinut apuussimapput, soorlu aamma Gallup-ip misissuineragut ersersinneqartoq kalaallit meeqqat atuarfianni atuartut meeqqat pisinnaatitaaffiinnik ilisimasaqarnerat 23 % -imiik 38 % -imut qaffassimasoq, tamannalu ukiut tallimat ingerlaneriinnaani pisimalluni.

Ukiuni tallimani tulliuttuni 2020-ip tungaanut NAKUUSAp nuna tamakkerlugu kommunit atuarfiillu qanittumik suleqatiserissavaat, meeqqat qitiutinnerulernissaannut kalaallisut immikkut ittumik suleriaatsimik pilersitsisussamik.

NAKUUSA pillugu isumaqatigiissut nutaaq

NAKUUSA pillugu isumaqatigiissutip siulia

 

Paasisaqarnerorusukkuit aaqqissuusami siulersuisoq Arnavaraq Jørgensen attaveqarfigiuk, ajoergensen@unicef.dk, mobil +45 3028 1895 imaluunniit NAKUUSAmi aqutsisoq Najaaraq Møller, moln@nanoq.gl, mobil +299 53 92 03.