Kruse GE-mut KNAPK-mullu: Akisussaaqataalissaasi

Aalisarnermut, Piniarnermut Nunalerinermullu Naalakkersuisoq, Karl-Kristian Kruse isumaqarpoq piffissanngortoq Kalaallit Nunaanni Sulisitsisut (GE), KNAPK-lu siunissami avaleraasartoortassanik agguaassisarnermi akisussaaqataasarnissaannik. Naalakkersuisuni ilaasortap kattuffiit ukiamut ataatsimeeqatigissallugit aggersarniarpai, ataatsimiinnermi aappaagumut avaleraasartoortassanik agguaassinissaq pingaarnertut oqaluuserineqassalluni.  

KNAPK aamma Sulisitsisut tusagassiorfitsigut Aalisarnermut, Piniarnermut Nunalerinermullu Naalakkersuisoqarfik sakkortuumik ullumi uparuarpaat ukioq manna avaleraasartoortassannik agguaassineq paamaarunneqarpallaartoq.

- Nuannaarutigaara kattuffiit ukioq manna avaleraasartoortassat agguaanneqarnerinut paamaarussineraallutik isumaqatigiissuteqarsinnaammata, Karl-Kristian Kruse oqarpoq.  

Naalakkersuisuni ilaasortap ilisimaarinerarpaa avaleraasartoortassanik agguaassineq sivisukulummat. Ingerlatseqatigiiffiit 49-it qinnuteqarsimapput katillugit 400.000 tonsit aalisarneqartussatut kissaatigineqarlutik. Ukioq manna avaleraasartoortassat 85.000 tonsiupput. 

- Naalakkersuisoqarfiup sulisuinut amerlanngitsunut qinnuteqaatit suliarineqarneri pisariusimapput piffissangaatsiarlu atorneqarsimalluni, qinnuteqaatit kinaassusersiorneqanngitsumik aalajangiiffigineqartussaagamik, Karl-Kristian Kruse oqarpoq.

Sulisitsisut aamma KNAPK uparuaanerminni ilanngullugu apeqqutigaat sooq naalakkersuisoqarfik pisariaqartunik suli aalajangiisinnaasimanngitsoq, ingammik siorna misilittakkat eqqarsaatigalugit. Taakkulu aamma tikkuarpaat nunatsinni avaleraasartoorniarneq nutaajummat immikkut pilersaarusiortarnissaq pisariaqartartoq.

- Nunatsinni avaleraasartoorniarneq nutaajulluinnarpoq, taamaammat naalakkersuisoqarfik pisassanik agguaanissamut tunngaviusussanik nutaanik pisariaqartitsivoq.  Avaleraasartuunummi pisassanik agguaassinissamut tunngaviusussanikaalajangersimasunik peqanngilaq, soorlu raajanut qaleralinnullu pisassanik agguaasarnermut assingusumik, Naalakkersuisuni ilaasortaq erseqqissaavoq.  

Avaleraasartuunik siunissami agguaassisarnissaq pisariinnerulersinniarlugu Naalakkersuisuni ilaasortap nunatsinni aalisarnermik aallussallit ukiaru ataatsimeeqatigissallugit aggersarniarpai. Ataatsimiinnerup pingaarnertut oqaluuserisassaa tassaassalluni: Suna suullu tunngavigalugut aappaagu avaleraasartoortassat agguaassinnaavagut.

- Neriuutigaara kattuffiit taamanikkussamut ullumikkutut isumaqatigiitsigissasut, taamaattoqarpammi tamatuma kingunerisinnaavaa avaleraasartoortassanik ukiortaaq aallartissimaliinnartoq agguaassisoqartoq, Karl-Kristian Kruse oqarpoq.

Eqqortoq aamma kikkut

Pingaartuuvorli oqaatigineqartut eqqortumik oqaatigineqarnissaat.

Sulisitsisut aamma KNAPK uparuaanerminni tikkuarpaat nunatsinni suliffippassuit annaaneqassasut, erseqqissumilli oqaatiginngilaat suliffiit suut annaaneqassanersut.

Aalisariutit nunatsinneersut nunatsinneersunik inuttaqartarput, taamaalillutik nunatsinnut akileraartuusarlutik. Taamaattumik taakku avaleraarsartoorniartussatut salliutinneqartarput, nunatsinnut amerlanerpaanik akileraarutitigut isaatitsisarmata.

Ingerlatseqatigiiffeqarporli namminneerlutik kilisaataateqaratik avaleraasartoorniartartut, allamiunik inuttaqartitsillutik aalisartitsisartunik.

Aalisartitseqatigiiffiit arlalissuit siorna taama iliorput. Taakkunanit ataasiinnaq inuttanik nunatsinneersunit ilinniartitsivoq. Inuttat pineqartut 14-upput.

Taamaammat uparuaasunut aperisoqarsinnaavoq suut suliffiit annaaneqarsimanersut.

Aalisarnermik aallutallit Naalakkersuisoqarfimmit ataasiaannaratik saaffigineqartarput avaleraasartuut pillugit qaninnerusumk suleqatigiumallugit.

Ingerlatseqatigiiffiit avaleraasartoorniartitsisut aamma kattuffiit Naalakkersuisoqarfimmeersunit ukioq manna arlaleriarlugit ataatsimeeqatigineqartarput.

Ataatsimiinnerni ataatsimeeqataasut naalakkersuisoqarfimmit peqquneqartaraluarput aalisarnerup pitsaanerusumik aaqqissuunneqarnissaanut siunnersuuteqaqqullugit.

NUSUKA kisiartaalluni siunnersuuteqarpoq. Taamaammat kina kikkullu avaleraasartuunik aagguaassinissamut paamaarussisimanersut maannakkut apeqqutigineqarsinnaavoq.

Taassuma saniatigut ippassaaninnguaq Aalisarnermut Siunnersuisooqatigiit Aalisarnermut, Piniarnermut Nunalerinermullu Naalakkersuisoqarfik taperserlugu allaaserisaqarput, sulisunik amerliliinissamut suliniuteqartoqarnissaanik ilaliillutik. 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. Mail: emanuel@nanoq.gl.