A/S Inissiaatileqatigiiffik INI maajip 20-anni Sisimiuni ataatsimeersuarpoq

Ingerlatseqatigiiffiup ukiumoortumik nalunaarusiaata akuerineqarnissaa ilaatigut oqaluuserisassaniippoq.

Ukiumi nalunaarusiami atuarneqarsinnaavoq 2014-imi sinneqartoorutit akileraarutit ilanngunnagit 6,9 millioner kruuniusut kiisalu akileraarutit ilanngaatigereerlugit 4,7 millioner kruuniusut, angusarlu naammagisimaarnarluinnarpoq. INI-p ukiumut angusani  12 millioner kruuninik pitsanngoriartippai, naak kaaviiaartitsineq annikilleriaraluartoq.

Pingaarnerusutigut 2014 ataatsimut isigalugu ukiuusimavoq INI-mi suleriaatsimik nutaamik allannguisoqarluni, taamaasilluni INI sullissiviussalluni pitsaasumik ingerlalluartumillu suliffeqarfiusoq.

Ataatsimeersuarnermi Kim Kielsen-ip iluarisimaarlugu oqaatigaa sulisumi piginnaasai qaffassarniarlugit ilinniartinnissaat ingerlatseqatigiiffiup aallutarigaa.  Naalakkersuisut taakku saniatigut naatsorsuutigaat ingerlatsiviup sulissutigissagaa ingerlatsivik pitsaasumik aalajaatsumillu sullissisinnaanissaminut sulissuteqaannassasoq.

Siulersuisut nukittorsarniarlugit Kristian May siulersuisuni nutaatut qinigaavoq. Kristian May inatsisilerituutut ilinniarsimavoq, taamaattoq sutigut tamatigut eqeersimaartuulluni, ukiorpanngortuni sanaartornermik Skandinaviami annerit ilaanni ingerlatsivimmi pisortaasimalluni Kalaallillu Nunaannut annertuumik ilisimasaqarluni. Kristian May-ip ilanngunnerata saniatigut siulersuisuni maanna ilaasortaasut qinigaaqqipput.

Piffissami aggersumi siulersuisut tassaassapput Jette Larsen, siulittaasutut, aamma Carsten Pietras, Karin B. Orgland kiisalu Kristian May.

Attaveqarfissaq:

govsec@nanoq.gl