Koreap aallartitaa tikeraarpoq

Koreap aallartitaa Young-sam Ma una sapaatip akunnera Kalaallit Nunaannut tikeraarpoq, maajillu 12-annit 14-annut Nuummi ataatsimeeqattaarluni. 

Tikeraarneq Inuussutissarsiornermut, Suliffeqarnermut Nunanullu allanut Naalakkersuisup Vittus Qujaukitsoq peqaigalugu pilersaarusioqataaffigineqarpoq. Aallartitaq Ma ilaatigut Aningaasaqarnermut Aatsitassanullu Naalakkersuisoq, Anda Uldum – Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen ataatsimeeqatigai. Taakku saniatigut nunatsinni inuussutissarsiornermi suliaqartut laatigut Royal Greenland, Greenland Holdingilu aamma ataatsimeeqatigai. Marlunngornermi maajip 12-ni Kalallit Nunaata Ilisimatusarfiani Tina Pars ataatsimeeqatigaa, tamatumalu kingorna Ilisimatusarfimmi ”Koreap Teqeqqua” ammaanersiorneqarpoq. 

Ataatsimiinnerni pingaarnertut oqaluuserineqarput annertunerusumik niueqatigiilernissaq nunallu taakku marluusut immitsinnut suleqatigiinnerulernissarput, ilaatigut aatsitassaqarnikkut, aalisarnikkut, ilisimatusarnikkut takornariaqarnikkullu ingerlanermi. 

Vittus Qujaukitsoq oqaaseqarpoq: 

”Nuannaarutigaara Koreamit pisortatigoortumik tikeraartoqarnerput. Tassuuna ersersinneqarpoq ukini kingullerni Nunatta Koreallu patajaatsumik suleatigiissimanerat – pingaartumik 2012-mit.  Pingaartumik aatsitassaqarnikkut, aalisarnikkut, ilisimatusarnikkut takornariaqarnikkullu suliat pillugit Korealu annertunerusumik suleqatigiissinnaanerup annertusarneqarsinnaanera periarfissaqarluarpoq. Ilisimatusarfimmi ”Koreap teqeqquanik” ammaanermi Koreap peqataalluarnermigut uppernarsarpaa illugiilluni suleqatigiinnissaq pimoorunneqartoq, tassuunakkullu Kalaallit Nunaata Koreallu paarlaasseqatigiinneq annertusarniarneqarpoq – niuernerinnaanngitsukkut aningaasaleriinnaanngitsukkullu, kisiannili ilinniartut issittoq pillugu ilisimasat paarlaasseqatigiinnerisigut tamanna aamma pissalluni. 

Koreamik suleqateqarluarnerput siunissami ingerlaavartuarnissaa qulakkeerniagassaraarput, taamatullu Koreamiut nunatsinnut tikilluaqqusaasutut misigitittuarnissaat qulakkiigassaraarput. Koreap Kalaallillu Nunaata suleqatigiilersinnaanerat annertuumik periarfissaqarluarpoq.”

Inussiarnersumik inuulluaqqusillunga 

Vittus Qujaukitsoq 

Attavigineqarsinnaasoq:
Kai Holst Andersen 
Toqq. +299 34 51 51
kaoa@nanoq.gl