Siusinaartumik pensionisiat

Siusinaartumik pensionisiat: Kommunit aaqqissuusseqqinnermut atatillugu immikkut aningaasaliivigineqassapput

KNR-i aqqutigalugu KANUKOKA oqariartuuteqarpoq, kommuninngooq naammattunik sulisussaqanngitsut siusinaartumik pensionisiallit nalilersuiffigeqqinnissaanut. Tamatuma saniatigut kommunit kattuffiata apeqquserpaa, ilumut suliffinnik nikerartunik piffinni suliffissaqarfiungaatsiareersuni pilersitsisoqarsinnaassanersoq.

”Oqariartuutigineqartut uggorinngitsuunngilakka, tassami siusinaartumik pensionisiat aaqqissuuteqqinneqarnissaanut tunngatillugu siunniunneqarsimammat sulisut amerlineqarnissaanut immikkut 3,2 mio.kr.-ninik aningaasaliisoqassasoq. Taakkulu saniatigut suliffissanut nikerartunut immikkut 41 mio.kr.-ninik aningaasaliissuteqartoqassasoq. Taamaattumik uanga ilisarisinnaanngilara ilumut kommunit oqariartuuteqassappata aaqqissuusseqqinnermut tunngatillugu akissaqartitsinnginnermik oqalunnerat”, taamatut oqaaseqarpoq Ilaqutariinnermut Naalakkersuisoq Martha Lund Olsen erseqqissaassutigalugulu nammineerluni borgmesterit ataatsimeeqatigisareersimagamigit, taakkuli peqatigalugit paaseqatigiissutigisimallugu aaqqissuusseqqinnerup nassatarisassai tapiissutit ataatsimoorussat isumaqatigiinniussutigineqarnerannut atatillugu tapitartuuneqarumaartut. Tamakkulu tamaasa aqqutigalugit qulakkeerniarneqassasoq kommunit ernumassutigisinnaasaasa suleqatigiissutigalugit aaqqiissuteqarfigineqarnissaat.

Ilaqutariinnermut Naalakkersuisup ilanngullugu oqariartuutigivaa, inatsisissap suliarineqarneranut atatillugu qulakkeerneqarsimasoq, siusinaartumik pensionisiallit naak suli sulisinnaassuseqaraluarlutik taamaattumillu taakkununnga naleqquttunik suliffissaqartinneqarsimanngippata ilivitsumik pensionisiaqartinneqartassasut, tamannalu atuutitinneqartassasoq suliffissarsisinneqarsinnaanissaat tungaanut.

”Erseqqissaatigerusoqaara kikkulluunniit sumiginnarlugit assersuutigalugu maannakkumiit annikinnerusumik siusinaartumik pensionisiaqalersinneqarnissaat anguniarneqanngimmat. Ilaatigummi siusinaartumik pensionisiallit ikigisassaanngitsut maannamiit pisartagarisimasaminnut sanilliullugu qaffasinnerusumik pisartagaqalissammata.”

Tamatuma saniatigut inatsisissatut siunnersuut aaqqissuusseqqinnernut allanut maannakkullu Naalakkersuisut aallartisarsimasaannut sanilliullugit isigineqartariaqarpoq. Suliffeqarnikkut inissaqartitsinerunissaq aqqutissiuuneqarneranut atatillugu siusinaartumik pensionisiaqartitsisarnernut tunngatillugu aaqqissuusseqqinnertut isigisariaqarpoq, tamatumanimi aamma sulissutigineqarmat sulisitsisut piumaffigineqassammata piffik tamaaat sulisinnaassuseqanngitsunik sulisoqarnerulernissaat. Tamatumani aamma kommunit, namminersornerusut aammalu suliffeqarfiit namminersornerusunit pigineqartut pineqarput. Taakkua saniatigut arlaatigut pisortanik sullissisuusartut piumaffigineqartalissapput suliffissanik akunnattunik, inersimasunut ilinniarfiusinnaasunik, piginnaanngorsaqqiffinnik il.il. pilersitsiortornissani nammaqataaqqullugit. Tamakkumi tamarmik nunani assigiinngitsuni periuserineqarlutik iluatsilluartumik misilittagaqarfigineqareerput.

Naalakkersuisunut anguniagaq ersarissuuvoq: Isumaginninnikkut suliniuteqartarnigut sanngiinnerusunut sammisuupput, taamaattumillu pikkoriffiginerusariaqalerparput innuttaasut sulisinnaasutut isigisatta pisortanit piorsarneqaannaratik imminnut napatikkiartulersinnaanissamut ikorfartornissaannut. Tamatumuuna aamma aqqutissiuunniarneqassaaq, inuit assigiinngitsutigut atugarliuuteqartut suliffeqarnerup avataani inissisimaannalinnginnissaat.
Siusinaartumik pensionisiaqartut isaannit isigalugu suliffeqarnerup iluani akuunerulersinnaanermikkut pitsannguutissat arlallit periarfissarilissavaat. Tassunga tunngatillugu Martha Lund Olsen-i imatut oqariartuuteqarpoq:
”Siusinaartumik pensionisiallit maluginiarumaarpaat ulluinnarni imaqarnerusumik akunnaannerusumillu inuuneqalerlutik, aamma meerarisat meeqqerivinnut atuarfinnullu attaveqarnerulernissaat aqqutissiuuneqarnerusinnaassammat. Tamakku tamarmik aqqutissiuusseqataaffigissavaat isumaginninnikkut kingornussat ullutsinni anigorniakkavut qaangeruminarnerulernissaat”.

Taamaattumik ataatsimoorluta sulissutigisariaqarparput siusinaartumik pensionisiallit akunnattunik suliffissarsinissamut periarfissaasa annertusaavigineqarnissaat. Tamannami pineqartunut peqqinnarnerpaassammat.