Peqqinnissakkut kiffartuussinerup pitsaassusaa allannguuteqassanngilaq

Peqqinnissaqarfik 2015-imi aningaasanut inatsit naapertorlugu 15 mio. koruuninik sipaaruteqartussaagaluaq, innuttaasunik nakorsiarnerup kiffartuussinerullu ajorseriaateqartinnginnissaannut periarfissaqarpoq. Aningaasat ukiumi naatsorsuiffimmi 2014-imi natsorsuutini sinneqartoorutinit aaneqassapput.

Peqqissutsimut Naalakkersuisoq Martha Lund Olsen 2015-imi ukiunilu tulliuttuni peqqinnissakkut kiffartuussinerup allannguuteqannginnissaa siunnerfigalugu suliniuteqarpoq:

”Sipaaruteqarnissap innuttaaqatitta napparsimasut nakorsartinnissamik neqeroorutigisinnaasatsinnik eqquinnginnissaa uannut pingaaruteqarpoq. Nappaatinik nakorsaaneq akissaqartissavarput. Qujanartumik siorna aningaasartuutissatut missingersuutini peqqinnissaqarfiup aningaasaliissutit tamakkerlugit atunngimmagit 2015-imi aningaasaliissutinit sipaarutigeqquneqartut 15 mio. koruunit missaat matussutissaqarput".

Peqqinnissakkut sullissisut suleriaasaasa eqaannerulersinnerisigut teknologiillu periarfissarsiullaqqinnerusumik atorneqarneragut, aningaasartuutikinnerulluni anguniagassatut siunniussaareersut angunissaannut aningaasat amerlanersaat aaneqassapput.

Siunissami peqqinnissamut tunngatillugu iliuusissat

Peqqinnissaqarfiup sullissinissamut neqeroorutaasa innuttaasunut pingaaruteqassusaat Naalakkersuisunit ilisimaarilluarneqarpoq. “2015-imi aningaasanut inatsisissap suliarineranut atatillugu ernumassutaasutut saqqummiussat tusarnaarpakka 2016-imullu aningaasanut inatsisissatut siunnersuusiornissap pilersarusiorneqarnissaanut atatillugu, peqqinnissaqarfiup aningaasaqarnerata iternga tikillugu misissuiffigineqarnissaa sulissutigaara” Martha Lund Olsen oqarpoq. 

Misissueqqissaarneq aningaasanut inatsisissap isumaqatigiinniutaanissaa sioqqullugu aallartinneqareersumi kiffartuussinermut atatillugu anguniagassatut siunniussat arlallit eqqarsaatigalugit aningaasat qanoq annertutigisut pisariaqartinneqarnissaat paasiniarneqassaaq. Peqqinnissaqarfimmut tunngatillugu amerlanerussuteqarluartunit isumaqatigiissutigineqartumik ukiunilu arlalinni atuuttussamik pitsaasunik qularnaatsunillu toqqammavissiiutigaluni attartuumik aningaasaqarnikkut ineriartorfiusinnaanissaa anguniagassatut siunnerfiuvoq.

Suliap immikkoortua siulleq maajip naanerani naammassisussatut naatsorsuutigineqarpoq, nalunaarusialli tamakkiisup septembari qaammat naammassinissaa naatsorsuutigineqarpoq.

 

Annertunerusumik paasisaqarusukkaanni, attavigineqarsinnaavoq:
Pisortamut tullersortaagallartoq
Leif Grønvold Jensen, e-mail: legj@nanoq.gl , oqarasuaat (+299) 34 66 16.