Nikuigit natermut piit

Timigissarneq peqqinnartoq nalunngilarput. Qanorli iliussaagut issialluni ulloq naallugu sulisaraanni, imaluunniit atuartuugaanni qarasaasiarlu nutsuippat. Siunnersuutitsialaat aaneqarsinnaalissapput isumassarsiorfimmi, Nuummi Sisimiunilu saqqummersinneqartussami peqqinnissamik kajumissaarisoq Chris MacDonald isumassarsisoralugu.

Takorlooriassagit suleqatillu ataatsimiinnissaq pingaartoq piareersarlusiuk. Suliffimmi ataatsimiittarfik kaffisoqatigiiffiginagu pisuttuaritsi ataatsimiinnissap imassaa oqaloqatigiissutigalugu. Tassa isumassarsiat quppersakkami nassaarineqarsinnaasut ilaat: isumassarsiorfik – isumataarfissaq timikkut aalanissamik qiimmassaasoq.

Kikkut tamarmik sungiusarsinnaapput peqqissuuniarlutik. Tassa isumassarsiorfiup isumaa, ersarissumik  saqqummiunneqartussami Nuummi pingasunngorneq Maajip 13-ani Sisimiunilu maajip 16-ani. Sumiiffinni taakkunani Chris MacDonald tusarnaarneqarsinnaavoq, taanna tusaamasaavoq oqalugiarluni isumassarsisitsisarnermigut.

Peqqissutsimut Naalakkersuisoqarfiup quppersagaq saqqummersippaa oqalugiarneriillu Sermersuup Qeqqatalu kommuniini pinaveersaartitsisut suleqatigiinnerisigut ingerlanneqarluni.

Peqqinneq ulorianartorsiorpoq

Meeqqat ullumikkut qangamut sanilliullugu aalanikinnerupput. Niviarsiaqqat marluugaangata ataaseq, nukappiaqqallu pingasuugaangata ataaseq sapaatip akunneranut akunnerup affaannaa timimik aalatitsinissamut atortarpaat.
Isumassarsiorfimmi ilinniartitsisut atuarfimmilu siuttut ilioriasaarnernik nassaarsinnaapput meeqqanut soqutiginartunik. Soorlu timimik aalatitsilluni pinnguarneq ilinniartitsinermi ilanngunneqarsinnaavoq, imaluunniit atuarfimmiittut tamarmik ulloq aallartissinnaavaat pisuttuarlutik arpallutilluunniit.

Ullumikkut amerliartortut ullup ilarujussua uninngaannarlutik issiallutillu sulisarput. Tamanna oqimaappallaalernermik kinguneqarsinnaavoq nappaateqalersinnaanerillu soorlu sukkorneq uummatillu taqarsuatigut napparsimalersinnaaneq qaninnerulertarlutik.

Ullormut 11 tiimit issiasaraanni ullormut 4 tiiminik sivikinnerusumik issiasartuninngarnit sanilliukkaanni, taava misissuinerit takutippaat sioqqutsilluni toqunissaq 40 procentimik annerulertartoq. Tassa peqqutissaqarluarpoq ullup ingerlanerani sulilluni aalasarnissaq, majuartarfikkoorneq imaluunniit arpaasit saqqummerlugit.

Aalaqatigiinneq

Martha Lund Olsen, Peqqissutsimut Naalakkersuisup nuannaarutigai quppersakkami pitsaasut amerlasuut isumassarsiat:

- Neriuppunga amerlasuut isumassarsiorfik ujartuiffigiumaaraat qanoq timigissartarnissaq eqqarsaatigalugu, namminermut naleqquttumik imaluunniit illoqarfimminnut nunaqarfimminnulluunniit, atuarfimmut suliffimmulluunniit.  Timigissarnerup inuusaatsikkut nappaaterpassuit pinaveersimatissinnaavai, kisianni aamma nuannisarfiusinnaavoq, minnerunngitsumik ataatsimoorluni.

Isumassarsiorfik pingasunngorlugu suliaavoq, tamarmik immikkut atuarneqarsinnaapput. Siulliup atuarfik sammivaa, tulliata suliffimmi isumassarsianik tunisivoq, kingulliullu inuiaqatigiit nalinginnaasumik sammivai, qanoq illoqarfinni nunaqarfinnilu najugallit kajungissaaqatigiissinnaasut aalanerulernissamut. Suliniutit misilittarneqarsimasut pineqarput.

Isumassarsiorfik atuarneqarsinnaavoq uani www.peqqik.gl.

 

Annerusumik paasisaqarniaruit saaffissaq tassa Peqqissutsimut Sulianut Siunnersorti Margit Sander Granlien oqarasuaat: +299346638 imal. e-mail: masg@nanoq.gl