Innuttaasunik peqataatitsineq annertooq

Anorthositimik piiaaffeqalernissamik suliniummut innuttaasunik peqataatitsineq annertooq

Vittus Qujaukitsoq, Mala Kuko Høy aamma Borgmester Herman Berthelsen Qaqortorsuarmi anorthositimik piiaaffeqalernissamut suliniut pillugu innuttaasunik tusarniaaneq annertooq ingerlanneqaqqammerpoq.

 

Hudson Resources peqatigalugu Kangaamiuni, Maniitsumi, Itillimi, Kangerlussuarmi, Sarfannguani Sisimiunilu atatsimiititsisoqarpoq.

Aaqqissuussinernut aggiasoqarluarpoq. Apeqqutit oqaaseqaatillu assigiinngitsunik imaqarput, soorlu suliniutip avatangiisinut sunniutissai, piniarnissamut periarfissat innuttaasullu qanoq ittunik suliffissaqarsinnaassanersut.

Sammineqartut allat tassaasimapput kalaallit suliffeqarfiutaat qanoq ilillutik suliassap pisataanik pilersuisunngorsinnaanersut aningaasaateqarfinnillu ilinniartitaanermut, kulturimut, timersornermut il.il pilersitsisoqassanersoq.

DCE-mi Pinngortitaleriffimmilu immikkut ilisimasallit uppernarsarpaat suliniut allanut sanilliullugu pisariitsunnguusoq avatangiisinut killilimmik taamaallaat sunniuteqarumaarluni.

Ataatsimut isigalugu innttaasut suliniummik tapersersuisorujussuupput.

Tusarniaaneq maajip 29-anni naappat akissutigineqarsimasut misissorneqarnissaat tullinnguuppoq, taamaalillutik Naalakkersuisunut saqqummiunneqassallutik selskabip piiaaffeqalernissamik qinnuteqaataanut ilanngullugit.

- Suliniutip Kalaallit Nunaannut  qanoq iluaqutissiinissaa pillugu IBA-mik isumaqatiginninniarnissap ungasinngitsukkut aallartinnissaa qilanaarivara.  Naalakkersuisut Qeqqata Kommunia peqatigalugu qulakkeerniarpaat suliffiit amerlanerpaartaasa nunaqavissunit inuttaqarnissaat suliniummullu pisiniartarfissatut suliffeqarfiit nunatsinneersut isumaqatigiissuteqarfigineqarnissaat, Vittus Qujaukitsoq oqarpoq, nangillunilu:

- Oqaatigineqartariaqarsoraarattaaq aatsitassanik annissinermi royalty-nik akitsuusiisoqartarnissaa innuttaasunit pingaartinneqarmat. Isornartorsiuisunut eqqarsaatissiissajunnarsivoq innuttaasunik ataatsimiititsinerni Hudson Resources-imit oqaatigineqarmat inuiaqatigiinnut kalaallinut akitsuummik akiliinissaq isumaqatigalugu. Piffissap sivikitsunnguup ingerlanerani piiaaffiup aappaata royaltymik akiliisartussap pilersinneqarnissaanut ingerlaarpugut.

Innuttaasunik ataatsimiititsinernit assit takukkit.

 

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist oqarasuaat +299 559424 imaluunniit e-mail paok@nanoq.gl.