Avannaani Attumit nipisat suanniarneq aallartissaaq

Aqutsiveqarfinni 1Ba-mi aamma 1A-mi, avannarpasissutsip 67o22,5’ avannaanit nipisat suaannik tunisineq ataasinngorpat maajip 11-anni aallartissaaq. Aqutsiveqarfiup kujammut killeqarfiata Nassuttuup paava naleqqatigigajappaa.

Aqutsiveqarfik 1B apriilip 30-annit marlunngorlugu avinneqarmat, kujasinnerusortaqarlunilu avannarpasinnerusortaqalermat, 1Bb-mik 1Ba-millu taaguuteqartut, aqutsiveqarfiit arfineq marlunngorput.

Pisassiissutit
Aqutsiveqarfimmi 1Ba-mi nipisat suaat 279 tonsit pisassiissutaapput, 1A-mi 63 tonsit pisassiissutaallutik.

Tunisiffissaq kingulleq

Nipisat suaannik tunisineq unitsinneqassaaq pisassiissutigineqartut tamakkerneqarsimaleriarpata imaluunniit ullut aalisarfiusussat 47-it nallerneqarpata. Tallimanngorneq juunip 26-at tassaavoq ulloq tunisiffissaq kingullerpaaq, pisassiissutit nungoreersimanngippata.

Paasissutissanik amerlanerusumik perusuttoqarpat Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum, paasiniaavigineqarsinnaavoq. E-mail: jool@nanoq.gl