Karl-Kristian Krusep Sisimiut Aasiaallu tikeraassavai

Aalisarnermut, Piniarnermut Nunalerinermullu Naalakkersuisoq maajip 8-anni Sisimiuliassaaq. Sisimiuniinnermini aalisakkeriviit pulaassavai kommunalbestyrelsillu aalisarnermut ataatsimiititaliaa aamma ataatsimeeqatigissallugu.

Sisimiuniinnermini aalisarneq pillugu oqaluuserinnissaminut periarfissaqarfigissavaa Royal Greenlandip aalisakkerivissuanut aamma pulaarnissaminut periarfissaqassalluni.

Sisimiuni aalisartut Sømandshjemmip ataatsimiittarfiani unnukkut ataatsimeeqatigissavai.

Karl-Kristian Kruse Aasiannut arfininngornermi, maajip 9-anni ingerlaqqissaaq. Aasianniinnermini aalisartunik ataatsimeeqateqassaaq.

Aasianni inuussutissarsiornermut siunnersuisooqatigiit Aalisarnermut, Piniarnermut Nunalerinermullu Naalakkersuisumik, Karl-Kristian Krusemik, sapaatiuppat, maajip 10-anni ataatsimeeqateqassallutik periarfissaqassapput.

Aasianni inuussutissarsiornermut siunnersuisooqatigiit februaari aallartissimalersoq tupigusuutigilaanngitsuunngilaat Karl-Kristian Kruse ataatsimeeqatigineqarnissaminut aggersarneqarluarluni tikinngimmat. Kitaata sikua pisarnermisut taliaarnerummat, Polar Raajami sulisut 100-t soraarsitaasut pillugit ataatsimeeqatigineqarniaraluarluni.

Karl-Kristian Krusep inuussutissarsiornermut siunnersuisooqatigiit ilisimatereerpai Aasiannut sukkulluunniit tikissimaleruni ataatsimeeqatiginiarlugit. Taamaalillutik inuussutissarsiornermut siunnersuisooqatigiit Naalakkersuisuni ilaasortamik ataatsimeeqateqarnissaminnut periarfissaqassapput. Siunnersuisooqatigiit Karl-Kristian Krusemik ataatsimeeqateqarnissaminnut oqaluuserineqartussanik piumasaqareersimapput.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. E-mail: jio@nanoq.gl