Innuttaasunik ataatsimiititsinerit aallartittut

Qaqortorsuarmi Hudson Resourcep piiaaffeqalernissamut suliniutaata innuttaasunik ataatsimiititsissutigineqarnerat aallartittut

Inuussutissarsiornermut, Sulisoqarnermut, Niuernermut Nunanullu Allanut

Naalakkersuisoq Vittus Qujaukitsoq aamma Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko kiisalu Borgmesteri Herman Berthelsen Hudson Resources peqatigalugu Kangaamiuni Maniitsumilu innuttaasunik ataatsimiititsipput Qaqortorsuarmi aatsitassamik anorthositsimik piiaalernissamik qinnuteqaataa pillugu.

 

Piiaaffissaq 60-ingajannik sulisoqartussaavoq ukiullu 20-it sinnerlugit ingerlaneranni 200 mio. kr.-it missaannik selskabip isertitaqarumaarnissaa missingersuutigineqarpoq.

 

Innuttaasunik ataatsimiititsinerni innuttaasut apeqqutaat, oqaaseqaataat siunnersuutaallu tusarumaneqarput.

 

Innuttaasunit maannamut apeqqutigineqartut tassaanerupput avatangiisinut tunngasut, kalaallinik sulisoqarnissaq qanorlu inuiaqatigiinnit annertunerpaamik iluaqutissartaqarnissaa. Ataatsimiinerilli taakku marluk ingerlaneranni oqariartuut ataaseq erseqqippoq, tassalu suliniutip aallartigasuarnissaa innuttaasut kissaatigigaat.

 

”Suliffissat pisariaqartippavut”, oqarput.

 

Vittus Qujaukitsoq ataatsimiinnerit kingorna oqarpoq: ”Ataatsimiinnerit ornigarneqarluarnerat, minnerunngitsumillu apeqquterpassuit nunatsinnilu innuttaasunut suliniutip annertunerpaamik iluaqutaanissaanut siunnersuutit nuannaarutigeqaakka.”

Namminersornerullutik Oqartussat Tusagassiiviat ataatsimiinnernit imaqarniliorpoq, taamaalilluni innuttaasut ilanngussaat tusarniaanermut ilanngunneqarnissaat qulakkeerniarneqarluni. Imaqarniliornerit piaartumik www.naalakkersuisut.gl-imiilerumaarput.

Innuttaasunik ataatsimiititsinerit Itillimi, Kangerlussuarmi, Sarfannguani Sisimiunilu ulluni tullerni ingerlanneqassapput.

 

Paasisaqarnerorusuttut attavigisinnaavaat Tusagassiivimmi pisortaq Paornannguaq Kleist oqarasuaat 559424 imaluunniit e-mail paok@nanoq.gl.