Eqqagassalerinermut suliassaqarfimmi sanaartugassanut pilersaarut

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko pingasunngorneq ulloq 6. maj 2015 tusagassiortunik katersortitsivoq. Naalakkersuisut ”Eqqagassalerinermut suliassaqarfimmi sanaartugassanut pilersaarut” nutaaq katersortitsinermi saqqummiuppaa

"Anartarfileriviit amigaataasut; eqqaavissuit imaani avatangiisini mingutsitsisut; ikuallaaviit amerlavallaat atorsinnaanngitsut; ammaannartumik ikuallaanermi akuutissanik toqunartulinnik aniatitsineq – eqqagassalerinermut suliassaqarfimmi unammilligassat amerlasoorpassuupput ilungersunartuullutillu. Taamaattumik Eqqagassalerinermut suliassaqarfimmi sanaartugassanut pilersaarut manna pisariaqarluinnarpoq, taamaalilluta Kalaallit Nunaat minguinnerusoq – avatangiisitsinnut peqqissutsitsinnullu iluaqutaasumik - pilersissinnaallutigu", Naalakkersuisoq Mala Høy Kuko oqarpoq.  

Eqqagassalerinermut suliassaqarfimmi sanaartugassanut pilersaarut ilaatigut  Naalakkersuisut aalajangersimalluinnartumik qanoq aningaasat eqqagassalerinermut suliassaqarfimmut immikkoortinneqartut pingaarnersiuiffigissallugit naatsorsuutigineraat pillugu iliuusissanut pilersaarummik imaqarpoq.

Eqqagassalerinermut suliassaqarfik kommunit akisussaaffeqarfigaat, kisianni ”Eqqagassalerinermut suliassaqarfimmi sanaartugassanut pilersaarummi” nutaami kommunit Naalakkersuisunit ikiorniarneqarput – peqatigisaanik kommunit eqqagassalerinermut suliassaqarfiup iluani pisussaaffimminnik kivitsisussaaginnassallutik.

Suliassaqarfiit ataasiakkaat akornanni ungasissumut pilersaarusiornerup ataqatigiissaarinerullu pitsanngorsarneqarnissaanut ilaatillugu Naalakkersuisut aalajangerput, suliassaqarfiit arlallit iluanni, ilanngullugulu aamma eqqagassalerinermut suliassaqarfimmi, suliassaqarfimmut pilersaarummik suliaqartoqassasoq.

Saqqummiussat aamma Eqqagassalerinermut suliassaqarfimmi sanaartugassanut pilersaarut maannakkut matumani aaneqarsinnaavoq.

Saqqummiussat takukkit

Eqqagassalerinermut suliassaqarfimmi sanaartugassanut pilersaarut atuaruk

Ilanngussaq 1

Ilanngussaq 2

Ilanngussaq 3

Assilisat

Katersortitsinermit immiussaq tusarnaaruk