Nittartagaq akuersissutigineqarpoq

Inatsisartut akuersissutigaat Kalaallit Nunaanni nuna tammakkerlugu atuuttumik akeqanngitsumillu internet-imi suliffeqarfinnut nittartakkamik pilersitsisoqarnissaa

Suliffeqarfinnut nittartagaq suliffeqarnermi anguniakkanut ”Suliffeqarneq isumannaatsoq” ilaavoq pingaaruteqartoq, suliffissallu sumiinnerannik qanoq ittuunerannillu tamakkiisumik takunnissinnaanermut iluaqutaallunilu suliffissarsiortut piginnaasaannik paasisaqarnissamut aqqutaassalluni, taamaattumillu assut nuannaarutigaara nittartakkap pilersinneqarnissaanut Inatsisartut peqataanerat, Naalakkersuisoq Vittus Qujaukitsoq oqarpoq, nangillunilu:

”Internet-imi nittartakkap pilersinnerani siunertaavoq suliffissaaleqinerup annikinnerulersikkiartuaarnissaa, aammalu nunatta avataaniit nunatsinnut suliartortartut ikinneruleriartornissaat, suliffeqarfiit ajornannginnerusumik najugaqavissunik sulisussarsiorsinnaalernerisigut, aamma maanna suliffissaaleqisunik, kiisalu Suliffissarsiuussisarfiit ingerlaannaq takusinnaalissammassuk sumi suliffissanik inuttaqanngitsunik inuttaliisoqarsinnaanersoq. Taamaattumik isumaqarpunga nittartagaq suliffeqarnerup ataatsimut isigalugu maanna nutarterneqarnerani assut pingaaruteqalissasoq”.

Nittartagaq 2015-ip naalernerani atulissasoq naatsorsuutigineqarpoq.

 

Paasisaqarnerorusuttut attavigisinnaavaat Inuussutissarsiornermut, Sulisoqarnermut Niuernermullu Naalakkersuisoqarfimmi pisortaq Jørn Skov Nielsen oqarasuaat +299 34 50 00 imaluunniit e-mail jsn@nanoq.gl.