Air Greenlandimi ukiumoortumik ataatsimeersuarneq

Air Greenland Katuami ulloq 4. maj 2015 ukiumoortumik ataatsimeersuarpoq. Selskabip ukiumut naatsorsuutini 2014-imoortut saqqummiuppai. Selskabi akileraannginnermi 80,7 million koruuninik sinneqartooruteqarpoq, 2013-imut sanilliullugu 17,5 million koruuninik pitsanngoriaateqartumik. Ukiumoortumik ataatsimeersuarnermi iluanaarutinit piginnittunut akiliisoqarnissaa akuersissutigineqarpoq, iluanaarutiniillu 11,25 million koruunit Namminersorlutik Oqartussanut akiliutigineqarlutik.

Ineriartortitsinissamut  periarfissaqarpasigani 2014-imi ingerlanerliortoqaraluartoq Air Greenland suliffeqarfimmi suli annertunerusumik pisariillisaasoqarpoq taamalu aningaasartuutit ikilisissimallugit. Air Greenland 2014-imi ikinnerulaartunik ilaasoqarpoq attartortitsinermili siuariartoqarsimalluni.

Ukiumoortumik naatsorsuutit taamannak inerneqarnerat pissutigalugu Namminersorlutik Oqartussat siulersuisuniitsitaat toqqarneqaqqipput, tassalu Jens Willumsen aamma Julia Pars. Danskit naalagaaffiannit silersuisuniitsinneqartoq Lars Tybjerg Claus Holsteinimik taarserneqarpoq, SAS-ip siulersuisuniitsitai ingerlaqqittut. Lars Thybjergip ukiorpassuarni suleqatigilluarneqarsimaneranut Namminersorlutik Oqartussat qujassuteqarput. Taamaalilluni siulersuisuniittut ukuulerput: Jens W. Willumsen aamma Julia Pars Namminersorlutik Oqartussanit toqqarneqartut, Claus Holstein aamma Bjarne Eklund danskit naalagaaffiannit toqqarneqartut kiisalu SAS-ip siulersuisuniitsitai Benny Zakrisson aamma  Leif Rasmussen.

”Ingerlanerliortoqaraluartoq Air Greenland angusaqarluarmat nuannaarutigaarput. Naalakkersuisut aamma nuannaarutigaat Ilulissani siorna januaarimi ajutoortoareersorlu isumannaallisaanikkut sukaterisoqarsimammat,” Naalakkersuisut Siulittaasuat Kim Kielsen oqarpoq.

 

Ataatsimeersuarnermit assilisat takukkit. 

 

Paasisaqarnerorusuttut attavigisinnaavaat Ingerlatseqatigiiffinnut Allattoqarfimmi pisortaq Rasmus Pedersen, oqarasuaat +299 34 50 00 imaluunniit e-mail rasp@nanoq.gl.