50 millioner koruunit sipaarutissat nassaarineqarput

Naalakkersuisunit anguniarneqarpoq Aningaasanut inatsisip aappassaanneerlugu suliarineqannginnerani 2015-imut Aningaasanut inatsimmi sipaarutaasinnaasunik ukiumut 50 millioner koruuninik nassaarnissaq. Anguniagaq maanna anguarput. Sipaarutissatut siunnersuutit nassaarineqarput.

Suliassaqarfiit tamarmik sipaaruteqassapput. Naalakkersuisut ataasiakkaat oqartussaaffimminni qanoq siparuteqartiginissaat pillugu isumaqatigiissuteqarnikkut agguaasseriaasissaq suliarineqarpoq. Tassunga atatillugu ilinniartitaanermut peqqissutsimullu tunngasuni suliassaqarfiit suliassaqarfinnit allanit annikinnerusunik sipaaruteqassapput, tassa taakku kiffartuussinissamik ujartuineq annertusiartortillugu aningaasartuuteqarneruleriartoramik.

”Iluarisimaarluinnarpara Naalakkersuisut tamarmik sipaarutissatut pisariaqartinneqartunik nassaarniarlutik piumassuseqarnertik takutimassuk, taamaalillutta anguniakkavut angusinnaanngorpavut”, naammagisimaarinnilluni oqarpoq Anda Uldum, Aningaasaqarnermut Naalakkersuisoq, nangillunilu:

”Sulinitsinni aallaavigisimavagut sipaarutissat naapertuuttuunissaat mianersuussinissarlu. Tamanna iluatsilluartoq isumaqarpunga. Sipaarutissarpassuit millioner koruuniusut konto pingaarnernut 80-ingajalluinnarnut siammarterneqarput. Tamatumuuna takutinneqarpoq, konto pingaarnerit amerlasuut annikitsuarakkuutaanik tapersiissuteqartut, taamaalilluni inunnik isumaginninnikkut oqimaaqatigiissitsiniarneq allanngortinneqanngilaq”.

Aningaasaqarnermut Naalakkersuisoq naapertorlugu annertoqatigiinnik sipaaruteqarnissaq matumani pineqanngilaq, suliassaqarfinnili sapinngisamik annernannginnerpaamik sipaarfiusinnaasuni sipaaruteqartoqarluni.

Sapaatip akunnerata tulliata aallartinnerani Aningaasaqarnermut Naalakkersuisup partiit aningaasaqarnermut tunngatillugu oqaaseqartartui qaaqquniarpai 2015-imut aningaasanut inatsisissatut siunnersuutip pingajussaaneerlugu suliarineqarnissaanut isumaqatiginninniarnerit ingerlateqqinniarlugit.

Inussiarnersumik inuulluaqqusillunga

Anda Uldum, Aningaasaqarnermut Aatsitassanullu Naalakkersuisoq

 

Paasisaqarnerorusukkuit: Attavigiuk tusagassiornermi ataqatigiissaarisoq Martin Christiansen, mobil: +299 22 15 33