Qaasuitsup Kommuniata nakkutigisaagallarnera

Qaasuitsup Kommunia 2009-imi kommunit kattussuutsinneqarnerannut atatillugu kr. 60 millioninik akiliutigeriaannagassatut taarsigassarsivoq, isumaqatigiissuteqarneq malillugu 2015-imi utertinneqartussanik. Kommunip aningaasarliornini pissutigalugu taarsigassarsiaminik akilersuinini kinguartikkusussimavaa tamannalu pillugu Aningaasaqarnermut Naalakkersuisoqarfik isumaqatigiissusiorfigalugu.

”Isumaqatigiissutigaarput, taarsigassarsiat sapinngisamik piaartumik taarsersorneqassasut taamaalilluni kommunit nutaat arlaatigut kommunit avissaartinneqalissagaluarpata aallaqqaataaniit tamatumuuna artukkerneqannginniassammata”, Anda Uldum oqarpoq.

Anda Uldumip oqarnera malillugu isumaqatigiissutip kingunerisaanik suli kommuni - isumaqatigiissutaasut iluini - kissaatigisartik malillugu aningaasat atornissaannut - kiffaanngissuseqarluni iliuuseqarsinnaavoq.

”Qaasuitsup Kommuniata aningaasanik attartukkat peqqutigalugit nakkutigisaalerallarneq ilungersornartutut tiguaa. Kommunimit aningaasat taarsersukkat ikilisarniarlugit pilersaarutitut saqqummiunneqartoq Namminersorlutik Oqartussanit akuerineqassasoq neriuutigineqarsimangaluarpoq, taamaattorli taakkua kissaataat malillugit iliuusereqquneqartut sulissaagut. Tamatumunnga tunngatillugu erseqqissarumavara una iliuuseqarneq tusagassiuutitigut sammineqartumut attuumassuteqanngilluinnarmat, tassa ’naatsorsuutit ajorluinnarnerannik oqariartuutinut.” oqaaseqarpoq Ole Dorph, Borgmesteri Qaasuitsup Kommunia.

Isumaqatigiissutip malitsigisaanik taarsigassarsiat apparsarnissaannut kommuni piffissaqarnerulissaaq, sapinngisamilli kommunalbestyrelsip maannakkut qinigaaffiata ingerlanerani appartinniarneqassallutik ilutigisaanillu suli kommuni nakkutigineqassalluni.

”Nakkutiginninneq isumaqatigiissuteqarnerlu iluaqutissatsialaapput, aningaasaqarnermik aqutsineq kommunalbestyrelsip pitsanngortissappagu, ataavarnerusumik aningaasaqarnissaq qulakkeerlugu kommunillu taarsigassarsiai apparsaavigalugit. Nuannaarutigaara borgmesterip uangalu akunnitsinni paaseqatigiissinnaagatta”, Aningaasaqarnermut Naalakkersuisoq,  Anda Uldum oqarpoq.

Annertunerumik paasisaqarusukkuit saaffigikkit:

Allatsi Ejner Grønvold, mobil: 34 52 12, e-mail: ejner@nanoq.gl

Pisortaaneq Hans Eriksen, mobil: 94 78 02, e-mail: hae@qaasuitsup.gl