Ikerinnarsiortunik aalisarsinnaanermut qinnuteqartoqarsinnaavoq

Ingerlatsiviit avaleraasartuunik aalisakkanillu ikeriinnarsiortunik aalisarsinnaanerminnut qinnuteqarnissaminnut periarfissaqarput. Tunumi avaleraasartoortassat 85.000 tonsiupput. Pisassiissutit marlunnut avitaapput.

Pisassiissutit pingaarnerit 55.000 tonsit ingerlatseqatigiiffiit namminneerlutik aalisariutaatillit ikinnerpaamik 35.000 tonsit aalisarsinnaavaat, sinneruttut 20.000 tonsit aalisariutinit attartukkanit aalisarneqarsinnaassallutik.

Pisassiissutit pingaarnersiukkat aappaanniittut 30.000 tonsit ingerlatseqatigiiffinnit  aalisarneqarsinnaapput. Ingerlatsiviit 30.000 tonsit ilaannik aalisarniarlutik qinnuteqartut uppernarsassavaat ingerlatseqatigiiffimmik piginneqataasut sinerissap qanittuani aalisarsinnaanermut akuersissuteqaateqarlutik. Ingerlatseqatigiiffiulluunniit aamma uppernarsassagaa kalaallinik inuttanik aalisakkanik ikeriinnarsiortunik aalisarsinnaanermik pikkorissartitsisimanini.

Pisassiissutit avinneqartut aappaanni, pingaarnersiorneqartuni 30.000 tonsit ilaannik aalisarniarlutik qinnuteqartut uppernarsaatinik ukuninnga minnerpaamik nassiussipput.

  • Ingerlatseqatigiiffik CVR-nalunaarsuiffimmi nalunaarsorneqarsimassaaq piginnittullu aalisarnermut inatsimmi piumasaqaatigineqartunik naammassinnissimassalluni. Ingerlatseqatigiiffik pilersinneqalersutut inissisimappat, tassunga tunngatillugu uppernarsaatinik nassitsisoqassaaq - akuersissummik tunniussisoqartinnagu ingerlatseqatigiiffik pilersinniarlugu ataatsimeersuarneq ingerlanneqareersimassalluni
  • Ingerlatseqatigiiffik "ingerlatseqatigiiffittut akunnermiliuttutut" taaneqartutut Aalisarnermut inatsimmi § 6 naapertorlugu pilersinneqarsimassanngilaq.
  • Avaleraasartuunut akitsuutip akilernissaanut aningaasat tiguneqarnissaannut qularnaveeqqusiissummik/aningaaserivimmit qularnaveeqqusiissummik peqartoqassaaq, taassumalu atorunnaarfissaa ullulerneqarsimassaaq imaluunniit minnerpaamik 2016-imi kvartalit siulliannut atuutsinneqassalluni.
  • Aalisaritit nunanit allanit attartorneqartut nunani NEAFC-imi imaluunniit NAFO-mi ilaasortaasuni angerlarsimaffeqartuussapput imalluunniit nunani Cooperating Non-Contracting Party-tut NEAFC-imit akuerineqarsimasuneersuussallutik.
  • Attartornermut isumaqatigiissutip kiisalu aalisariutip angisussaa sumilu angerlarsimaffeqarnerinut uppernarsaatit assilinerinik nassitsisoqassaaq.
  • Ingerlatseqatigiiffinnut aalisariutinulluunniit ataasiakkaannut pisassanik tunniussineq pissaaq qinnuteqaatip suliarilluareerneratigut aamma piumasaqaatinik siuliani pineqartunik naammassinnissimanerinik nalilersuisoqareerneratigut.

Ammassassuit
Aalisariutit ammassassuanniartut killilersuiffigineqarneq ajorput, pisassiissutigineqartulli nungunneqaraangata aalisarunnaartassapput – aalisakkat paggatassiissutaasarmata.

Saarullernat
Aalisariutit avaleraasartoorniarnissamut akuersissutinik tunineqartut saarullernarniarnissamut aamma akuersissummik tunineqarsinnaapput. Aalisariutit saarullernarniartut killilersuiffigineqassanngillat, pisassiissutigineqartulli nungunneqarpata aalisarunnaassapput – aalisakkat paggatassiissutaasarmata.  Aalisariutilli attartortullugit saarullernarniartinneqartussat immikkut piumaffigineqarput. Ataani allassimasoq atuaruk.

Aalisariutit attartorneqartut
Aalisariutit attartorneqarlutik avaleraasartoorniarnissamut akuersissuteqartut, Kitaani misileraalluni ulluni ikinnerpaamik tulleriinni arfineq pingasuni avaleraasartoorniassapput imaluunniit saarullernarniassapput, pisassiissutigineqartut 50 procentiisa aalisarneqannginnerini misileraassallutik. Aalisariutit attartorneqartut nunanit  NEAFC-meersuussapput imaluunniit

NAFO-meersuussallutik, NEAFC-miilluunniit akuerineqarsimasuussallutik (Cooperating Non-Contracting Parties).

Qinnuteqarfissaq kingulleq
Aalisarnermut, Piniarnermut Nunalerinermullu Naalakkersuisoqarfik qinnuteqaatinik amerlaqisunik tigusaqalereersimavoq. Avaleraasartoorniarnissamut aalisakkanilluunniit ikeriinnarsiortunik aalisarnissamut siumoortumik qinnuteqartoqarsinnaavoq imaluunniit qinnuteqaat nassiunneqareersimasoq aamma allanngortinneqarsinnaalluni. Qinneqarfissaq ulloq kingulleq tassaavoq apriilip 22-at 2015.

Naalakkersuisut 2015-imi avaleraasartoortassat avinneqarneri, ammassassuit aamma saarullernartassat pisassiissutit apriilip arfineq aappaanni 2015-imi aalajangerpaat.

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum, email: jool@nanoq.gl

Qinnuteqarfissaq (Pdf)

Qinnuteqarfissaq (wordfil)