Siunissami atornerluinermut katsorsaasarnissamik pilersaarut

Naalakkersuisut "Siunissami atornerluinermut katsorsaasarnermik nunatsinni pilersaarutissatut siunnersuut" sap.ak. 18-imi saqqummiutissavaat. Pilersaarut peqqinnissaqarfiup, kommunit isumaginninnermillu suliaqartut akornanni suleqatigiilluarnikkut piviusunngorpoq.

-”Siunissami katsorsaasarnissamut pilersaarut 2013-imi Inatsisartunit aallartinneqartoq pillugu sulinerup inerneri maani sap.ak. 18-imi, imigassamik atuinitsinnik atornerluinerullu kingunerisinnaasaanik samminniffioreersumi takutissinnaagakkit nuannaarutigeqaara", Peqqissutsimut Naalakkersuisoq Martha Lund Olsen oqarpoq nangillunilu:

- ”Atornerluinerup inuiaqatigiinnut sunniuteqarnerlorujussuartarnera, kiisalu ilaqutariinni suliffeqarfinnilu ajornartorsiutaarujussuartarnera erseqqippoq. Taamaattumik atornerluinermut katsorsaasarnissamut pitsaanerusumik neqerooruteqarnissaq pisariaqarpoq. Atornerluinermut katsorsaaneq innuttaasumut pisariaqartitsisumut siunissamut aningaasaliineruinnanngilaq, inuiaqatigiilli aningaasaqarneranni aamma akilersinnaassalluni. Taamaammat aallartittariaqarpugut."

Naalakkersuisup Martha Lund Olsen-ip "Siunissami atornerluinermut katsorsaasarnermik nunatsinni pilersaarutissatut siunnersuut" Naalakkersuisut anguniagaasa anguneqarnissaanut pingaaruteqartutut ilagaat. Tamanna pingaartumik naalakkersuisooqatigiinnissamik isumaqatigiissummi ilaqutariit ikiortariallit aamma ikiorneqarnissaannik, suliffissaaleqinerup annikillisinneqarnissaanik, nunattalu ilinniarluarsimasunik sulisoqalernissaanik anguniakkanut tunngatillugu atuuppoq.

Aammattaaq pilersaarut Naalakkersuisut siusinaartumik pensionisianik aaqqissuusseqqinnermik suliaqarnerinut, pingaartumillu suliffeqanngitsut sulilersinniarlugit suliniuteqarnermut atasutut isigineqassaaq.

Pilersaarut suli aningaasalersorneqanngilaq, 2016-imulli aningaasanut inatsit pillugu isumaqatiginninniarnissanut ilaatinneqarnissaa Naalakkersuisut kissaatigaat.


Sukumiinerusumik paasisaqarusuttut Peqqissutsimut Naalakkersuisumut Martha Lund Olsen-imut attaveqarsinnaapput allattaa Lea Holm aqqutigalugu +299 346605-imut sianernikkut e-mailikkulluunniit leah@nanoq.gl

Siunissami atornerluinermut katsorsaasarnermik nunatsinni pilersaarutissatut siunnersuut.

Tusagassiortunik katersortitsinermi immiussaq

Assit