Dundas-imi avatangiisit

Dundas-imi avatangiisit ajoquserneqarnissaat pinngitsoortinniarlugu iliuusissat pillugit politikkikkut isumaqatigiissut

Dundas-imut tunngatillugu politikkikkut isumaqatigiissummi taamanikkut avatangiisinut Naalakkersuisuusumit Anthon Frederiksen-imit 2011-imi isumaqatigiissutigineqartumi allassimavoq, suliat avatangiisinut tunngassuteqartut naalagaaffimmit aningaasalersorneqarnissaannut apeqqut qaqeqqinneqarsinnaanngitsoq.

2011-imi taamanikkut Nunamut Namminermut, Pinngortitamut Avatangiisinullu Naalakkersuisuusoq Anthon Frederiksen, Dundas-imi eqqaavissuatoqqani marlunni avatangiisit ajoquserneqarnissaat pinngitsoortinniarlugu iliuusissat piviusunngortinneqarnissaannut tunngatillugu Kalaallit Nunaata aamma Danmarkip akornanni politikkikkut isumaqatigiissuteqarpoq. Saliinermik suliaqarneq 2012-imi septembarimi aallartinneqarpoq, aammalu avatangiisit ajoquserneqarnissaat pinngitsoortinniarlugu iliuuseqarnernik suliaqarneq 2013-imi septembarimi naammassineqarpoq. Politikkikkut isumaqatigiissummi taamanikkut avatangiisinut Naalakkersuisuusup Anthon Frederiksen-ip 2011-imi isumaqatigiissutigisaani allassimavoq: ”Uummannap/Dundasip Kalaallit Nunaannut utertinneqarnera pillugu suliami avatangiisinut tunngasut isumaqatigiissutikkut naammassineqarput, avatangiisinullu attuumassuteqartunik suliat naalagaaffimmit aningaasalersorneqarneri pillugit apeqqut qaqinneqaqqissinnaanani”.

2013-imi taamanikkut Naalakkersuisuusut isumaqarput, nunameersunut mingutsinneqarsimasunut ataavartussamik inissiiveqarneq, politikkikkut isumaqatigiissummi siunertaasunut naapertuuttumik avatangiisitigut akuersaarneqarsinnaasumik aaqqiissutissaasoq. Politikkikkut isumaqatigissummi siunertaavoq, eqqakkat sinerissamiit aamma imaani avatangiisiniit peerneqarnissaat, aammalu inissiivissaq tamatumunnga naapertuuttumik sumiiffimmi imaani avatangiisit qimallugit, eqqakkanik allanik inissiivioreersumut, inissinneqarpoq.

Nunameersut mingutsinneqarsimasut nunap ataani itisuumi inissinneqarput, nuna qeriuaannartoq nunameersunit mingutsinneqarsimasunit taakkunannga qaffasinnerulersillugu. Taamaalilluni nunameersut mingutsinneqarsimasut ullumikkut nunap ataani 1,5 meterit missaani ataatsimoorlutik serminngorsimapput. Itisuumi inissisimaneranni nunameersut mingutsinneqarsimasut taakkua aamma aasap qaammataanni panertannginnissaat qulakkeerneqarpoq. Peqatigisaanik inissiinerup suliarineqarnerani nunamut naleqqussarneqarpoq aammalu sumiiffik tulluuttumik kusanartumillu qimanneqarluni.

”Avatangiisit ajoquserneqarnissaat pinngitsoortinniarlugu iliuuseqarnissaq – iliuusissat avatangiisit sunnerneqarnissaannik pitsaaliuisussat – kisianni sumiiffimmit eqqagassat tamarmik peerluinnarneqarnissaannik ilaqanngitsoq, pillugu politikkikkut isumaqatigiissuteqartoqarsimasoq maluginiassallugu pingaaruteqarpoq. Maannakkut Pinngortitamut, Avatangiisinut Inatsisinillu Atuutsitsinermut Naalakkersuisutut isumaqarpunga siunissami assigusunik saliinissani, saliinissamut suliassarpiaq akisussaaffigilerlugu politikkikkut isumaqatigiissuteqannginnissaq pingaaruteqartoq. Tamatumunnga taarsiullugu saliinerup tamakkerlugu naammassineqarnissaata tungaanut saliineq mingutsitsisut akisussaaffigisariaqaraluarpaa.

Ajoraluarpoq taamanikkut Naalakkersuiuusoq Anthon Fredriksen taamaattumik politikkikkut isumaqatigiissuteqarnissaq toqqarsimammagu, kisianni pisoq pereerpoq, aammalu siusinnerusukkut Naalakkersuisuusimasut avatangiisit, aningaasaqarneq aammalu suna suliaqarnermi ajornannginnersoq eqqarsaatigalugit inissiivimmik aaqqiissuteqarnissaq toqqarsimavaat. Siunissami Kalaallit Nunaata saliinermi suliassat akisussaaffillu akisussaaffigilerlugit politikkikkut isumaqatigiissuteqartoqartannginnissaa uanga Avatangiisinut Naalakkersuisutut sulissutiginiarpara.” oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Annertunerusumik paasisaqarusukkuit Naalakkersuisoqarfimmi pisortaagallartoq Mette Skarregaard Pedersen mesp@nanoq.gl imal. +299 345122 atorlugit paasiniaasinnaavutit.