Iliuuserisat naammassineqarnerat

Stemningsbillede af Indlandsisen

Dundasimi avatangiisinut mingutsaaliuinermi iliuuserisat naammassineqarnerat

Kalaallit Nunaata siunissami Kalaallit Nunaata amerikamiut danskilluunniit Kalaallit Nunaanni avatangiisinut qimataannut akisussaaffimmik tigusiffigisaanik politikkikkut isumaqatigiissusiunnginnissaa pingaaruteqartoq Pinngortitamut, Avatangiisinut Inatsisinillu Atuutsitsinermut Naalakkersuisoq  Mala Høy Kúko isumaqarpoq.

2011-mi taamani Nunamut Namminermut, Pinngortitamut Avatangiisinullu Naalakkersuisuusoq Anthon Frederiksen Dundasimi eqqaavitoqqani marluusuni avatangiisinut mingutsaaliuinermi iliuusissat suliarineqarnissaat pillugit Kalaallit Nunaata Danmarkillu akornanni politikkikkut isumaqatigiissutissamik isumaqatigiissusiorpoq. Saliineq 2012-imi aallartinneqarpoq, avatangiisinullu mingutsaaliuinermi iliuusissat suliarineqarnerpiaat 2013-imi septembarimi naammassineqarput.

Saliineq politikkikkut isumaqatigiissut naapertorlugu ingerlanneqarpoq, tassanili ”Eqqakkat ulorianaatilittut” taaneqartut Danmarkimut nassiunneqanngillat, tamatumunngali taarsiullugu Dundasimi sumiiffimmut naleqquttumut, mallinit anguneqarnaveerlugu inissinneqarput. Tassunga EU-mi peqqussut, naasunik allanik siaruartitsisinnaaneq peqqutigalugu issumik EU-mut eqqussinissamut inerteqquteqarfiusoq tunngavigineqarpoq. Issup Danmarkimut nassiunneqarnissaa pillugu Naalakkersuisoqarfiup siunnersortaanit Danmarkimi Pinngortitamut Inuussutissarsiornermullu Aqutsisoqarfik attaveqarfigineqarpoq. Pinngortitamut Inuussutissarsiornermullu Aqutsisoqarfik 2013-imi juunimi nalunaaruteqarpoq, Kalaallit Nunaannit issoq eqqussinissamik inerteqquteqarnermut ilaatinneqartoq. Inerteqquteqarneq naasunik naasunillu tunisassianik il.il. eqqussisarneq pillugu nalunaarummut nr. 1301-imut, 17. december 2012-imeersumut ilanngussaq 3-p immikkoortuata 14-anni nassuiarneqarpoq.

Issoq mingutsinneqarsimasoq nunap qeriuaannartup qummut killingata ataanut inissinneqarpoq, tassanilu silap pissusiata allannguutigisinnaasai eqqarsaatigineqarput. Taamatut aaqqiissuteqarnissaq Naalakkersuisoqarfiup siunnersortaanit avatangiisinut akisussaasuusumit inassutigineqarpoq, aaqqiissutaasumilu politikkikkut isumaqatigiissummi 2011-meersumi anguniakkat, taamanikkut Nunamut Namminermut, Pinngortitamut Avatangiisinullu Naalakkersuisuusup isumaqatigiissuteqarfiginiarlugit aalajangigai tunngavigineqarput.

”Maanna Pinngortitamut, Avatangiisinut Inatsisinillu Atuutsitsinermut Naalakkersuisuusutut pingaartippara, siunissami saliinissani assingusuni nammineerluta saliinermik tigusinissatsinnik politikkikkut isumaqatigiissuteqartassannginnissarput. Saliineq saliinerup naammassivinnissaata tungaanut mingutsitsisup akisussaaffigisariaqarpaa. Saliinerit annertuut tamatigut nalorniffiusunik arlalinnik nalaataqarfiusarput, taamaattumillu akisussaaffimmik tigusiffigissallugit aarlerinarpallaartarlutik. Mingutsitsisup saliinermut akisussaatineqarneratigut, aamma Namminersorlutik Oqartussat saliinermut atatillugu saniatigut akiligassinneqannginnissaat qulakkeerneqassaaq.” Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Politikkikkut isumaqatigiissut, nakkutilliinermi nalunaarusiat il.il. tamarmik Naalakkersuisut nittartagaat aqqutigalugu takuneqarsinnaapput.

Annertunerusumik paasisaqarusunnermi attaveqarfissaq Naalakkersuisoqarfimmi pisortaagallartoq Mette Skarregaard Pedersen oqa. +299 345122

Uummannami/Dundasimi avatangiisit ajoquserneqarnissaat pinngitsoortinniarlugu iliuuseqarniarneq pillugu Avatangiisinut ministeriaqarfiup aamma Namminersorlutik Oqartussat akornanni isumaqatigiissut

Dundas, Avatangiisinik mingutsitsinnginnissamut suliniutit

Anthon Frederiksen-imut akissut