Avaleraasartoortassat pisassiissutiginerisa avinneri

Naalakkersuisut ippassaq, marlunngornermi apriilip arfineq pingajuanni 2015 aalajangerpaat ukioq manna avaleraasartoortassat pisassiissutigineqarnerisa avinneri.

Avaleraasartuut 55.000 tonsit ingerlatsivinnut aalisariutinik nunatsinneersunik pigisalinnut pisassiissutigineqassapput. Naalakkersuisut ingerlatsiviit namminneerlutik aalisariutitaatillit salliutippaat, ukiorlu ilivitsoq inuttaqartitsisinnaanissaminnut qulakkeerinnissimasut salliutillugit.

Avaleraasartuut 30.000 tonsit ingerlatseqatigiiffinnut najukkani ingerlanneqartunut aamma/imaluunniit ingerlatseqatigiiffinnut ikerinnarsiorluni aalisarnermik inuttanut kalaallinut ilinniartitsisimanerminnik uppernarsaasinnaasunut pisassanngortinneqassasut.

Kalaallit aalisariutaasa salliutinneqarlutillu naammattunik pisassinneqarnissaat pingaartinneqarpoq. Taamaasiortoqarneratigut kalaallit ikerinnarsiortunik aalisariutaataasa ineriartortinneqarneri sukkanerusumik ingerlanneqarsinnaassaaq kalaallillu inuttat avaleraasartoorniarnermik sukkanerusumik misilittagaqalersinneqarsinnaassallutik.

Ilutigalugu pingaaruteqarpoq ingerlatseqatigiiffiit kalaallit aalisariutaanik piginnittuusut ikaarsaariarnermi aalisariutinik nunanit allaneersunik attartorsinnaanissamut periarfissinneqarnissaat. Taamaasiornikkut siunissaq isigalugu kalaallit aalisariutinik nutaanik assigisaanillu aningaasaliissutissanut annertuunut akissaqarnerulernissaat qulakkeerneqassaaq.

2014-imi avaleraasartoorniarnermi tamakkiisumik aalisarneqarsinnaasunit 78.670 tonsiusunit 31.584 tonsit aalisariutinit nunatsinneersunit pisarineqarput. Ukioq manna naatsorsuutigineqarpoq aalisariutit nunatsinneersut siornarnit amerlanerusunik pisaqarnissaat.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum, email: jool@nanoq.gl