Uummannami ulorianartorsiorsinnaaneq ingasaassineruvoq

Uummannami timip sananeqaataani allannguummik peqarnermi ulorianartorsiorsinnaaneq ingasaassineruvoq

Uummannami innuttaasunut toqqissisimanngitsunut nakorsat siunnersuinissamik paasissutissiinermillu neqeroorput.
Sapaatip akunnera kingulleq Sermitsiaq allaaserinnippoq ilaqutariinni timip sananeqaataani allannguummik kingornuttakkamik peqartoqartoq, tamannalu suli utoqqalitinnani puigortunngornermik kinguneqarsinnaasoq. Tamatuma ajoraluartumik innuttaasunik Uummannami toqqissiunnaarsitsisimavoq minnerunngitsumillu illoqarfeerannguami inuit ataasiakkaat misigisimapput isiginiarneqarnermik. Tamanna assut ajuusaarnarpoq.

Tamatigut ajortuaannanngilaq
Ilumoorpoq Uummannami nakorsat maluginiarsimammassuk innuttaasut amerlanngitsut timip sananeqaataani allannguummik peqartut tamannalu nappaammik CADASIL-imik kinguneqartartoq. Aamma ilumoorpoq nappaat taanna imaannaanngitsunik kinguneqartarmat soorlu puigortunngornermik iluaallernermillu.

Pingaaruteqarpoq aalajangiutissallugu nammineq timip sananeqaataani allannguummik peqaraluarluni sivisuumik pitsaasumillu inuusoqarsinnaammat. Napparsimalernermik kinguneqartuaannanngilaq. Nappaatigilersimagaannilu innarluuteqalernermik kinguneqartuaannanngilaq. CADASIL inummiit inummut assigiinngitsorujussuarmik siaruaattarpoq.

Sapaatip akunnerata kingulliup aviisiani nalilerneqarpoq Uummannami inuit 50-it 100-llu akornanni timip sananeqaataani allannguummik ilisimanagu pigigaat. Tamanna toqqammaveqanngilluinnarpoq. Timip sananeqaataanik misiliinerit takutissimavaat ataasiakkaaginnarni ilimanaateqartoq CADASIL siammaassinnaasoq.

Timip sananeqaataanik misiliinerit
Periarfissaavoq inuit peqqissut Timip sananeqaataanik ajoqutilimmik peqarnersut paasiniassallugu. Aaviinerit Danmarkimut nassiunneqassapput misissugassanngorlugit.

Ajoraluartumik ullumikkut CADASIL-imut nakorsaateqanngilaq katsorsaasinnaasunik, taamaasilluni Timip sananeqaataanik misissortinnerit ajornartorsiutaasinnaapput. Pingaaruteqarpoq ulorianartorsiorsinnaasut misissortinnissaminut piumanersut paasissallugu. Taamaammat Uummannami nakorsat, CADASIL-imik nappaatilinnut ilaqutaasut eqqarsaatigalugit, siunnersuinissamut annertuumik suliaqarsimapput. Siunnersuinermut atatillugu Timip sananeqaataanik misilitsinnissamut piumasoqarsimanngilaq.

Uummannami nakorsat siunnersuineq ingerlappaat innuttaasullu toqqissisimanngikkunik peqqissaavimmut tikilluaqqusaapput saaffiginninnissamut nakorsamut aalajangersimasumut Annie Kerouedan oqaloqatigiumallugu, taassuma siunnersuinerit ingerlappai Nuummi Danmarkimilu immikkut ilisimasalinnik qanimut attaveqartarnermigut.

Naartumi paasiniaaneq
Nappaat kingornuttagaavoq. Angajoqqaat arlaat timip sananeqaataani allannguummik peqarpat taava 50 procentimik ilimanarsinnaavoq meeqqap sananeqaat kingornukkaa inuunermilu kingusinnerusukkut napparsimalersinnaalluni.

Naartumi paasiniaanermut neqeroorut tamatumalu kingunerani naartuersinnissamik aaliangerneq ileqqorissaarnikkut unammilligassaavoq imaannaanngitsoq, taamaasiornikkut angajoqqaat akunnattoornermik nalaataqalissagamik meeraq piiginnassanerlugu, naak meeraq ilimanaateqarsinnaasumik naliginnaasumik sivisuumik inuuneqarsinnaagaluartoq, nappaatip takkunnissaata tungaanut.

Innuttaasunut taamaattumik neqerooruteqarnermi aaliangiineq siunnersuisartunik ilisimasaqarluartunik ilaqarluni siunnersuineq pissaaq, taakkua ilisimasat ileqqorissaarnerlu tunngavigalugit isiginnittaaseqartussat.

Sananeqaammik taassuminnga pilinnut, naartumilu paasiniaanermi neqeroorutip, nassatarissavaa allanik napparsimalersitsisinnaasunik sananeqaatilinnut peqartunut aamma neqerooruteqarnissaq. Tamatuma kingunerissavaa inuttaasunik pisariaqanngitsumik inunnik napparsimalersitsineq tamannalu nappaatinut taamaallaat nalinginnaasumik inuuneqarnissaraluamik ajoqusiisinnaasunut atorsinnaavoq imaluunniit paasiniaaneq piaartoq nappaatip unitsinneqarsinnaaneranik kinguneqarsinnaasumut tassuunalu neqeroorfigineqarneq katsorsarneqarnissamik ajorunnaarutaasumik.


Suli paasisaqarusukkuit nakorsaaneq Anne-Marie Ulrik tlf: +299 34 43 00 imaluunniit e-mail: sundhedsledelsen@peqqik.gl attavigineqarsinnaavoq.