Ataatsimoorlutik nalunaarut

Nunavummi aamma Kalaallit Nunaanni naalakkersuisut ataatsimoorlutik nalunaaruteqarput

IQALUIT, Nunavut (April 24, 2015) Nunavummi Premier Peter Taptuna kiisalu Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq, puisinit tunisassianik niuerutiginnittarneq pillugu Den Europæiske Unionip (EU) puisit pillugit peqqussusaata (EF) nr. 1007/2009-ip iluarsaanneqarnissaa pillugu ullumi ataatsimoorlutik nalunaaruteqarput.

Nalunaarummi peqqussutip iluarsaanneqarnissaa pillugu EU kajumissaarneqarpoq, taamaalilluni tassani Nunavummi aamma Kalaallit Nunaanni puisinniarneq ileqquusoq piujuartitsinissaq pillugu tunngaviusoq naapertorlugu ingerlanneqartartoq akuerisaassalluni.

"Nunavummi sineriammi inuiaqatigiit aningaasaqarnikkut aamma inooqatigiinnermi-kulturikkut atugarissaarnermut puisinniarneq pingaaruteqarpoq, tassani aningaasaqarnikkut periarfissat killeqarlutik," oqarpoq Premier Taptuna. "Inuit puisinniartarnerat ukiuni tuusintilikkaani ingerlanneqarsimavoq. Piujuartussamik isumalluuteqarnermut pitsaanerusumik allamik assersuutissaqanngilaq. "

"Kalaallit Nunatsinni aamma Nunavummi puisinniartarneq ileqqorineqarpoq aammalu inooriaasiulluni akuerisaasoq, pisuussutinik uumassusilinnik piujuartitsisussamik atorluaaneq pillugu tunngaviusumik aallaaveqartoq. Ajornartorsiut taanna pingaaruteqartoq, uagutsinnut sunniisorujussuusoq, pillugu Kalaallit Nunaat aamma Nunavut ataatsimoorsinnaammata, aammalu EU-p puisit pillugit peqqussutaani sukaterinissamut imaluunniit annertunerusunik inerteqquteqarnissamut pissutissaqanngilluinnartoq, ataatsimoorlutik nalunaarutigisinnaammassuk qujamasuutigisorujussuuara" Naalakkersuisoq Vittus Qujaukitsoq oqarpoq.

Puisinniarneq aamma puisinit tunisassiat Issittumi inuiannut pingaaruteqarput. Tamanna ileqquuvoq aammalu inooriaasiulluni akuerisaasoq, pisuussutinik uumassusilinnik piujuartitsisussamik atorluaanissamik aallaaveqartoq.

"Ataatsimoorluni nalunaarummi, nunap inoqqaavisa ilaatinneqannginnerat, Inuit inuiaqatigiit akornanni iluaqutaasumik atorneqassasoq kissaatigaarput. Nunavummit neriuutigineqarpoq, oqartussatut akuerisaanissaq pillugu qanittumi qinnuteqaaterput, puisineersunik tunisassiornitsinnut ajoqusiinerit sumiiffissarsinissaannut alloriarnertut siullertut, EU-mit akuerineqassasoq " oqarpoq Premier Taptuna.

Nunavummi attaveqarfissaq: Yasmina Pepa, Chief, Public Affairs, Office of Premier Taptuna, 867-975-5059, ypepa@gov.nu.ca

Kalaallit Nunaanni attaveqarfissaq: Amalie Jessen, Immikkoortortami pisortaq, Aalisarnermut, Piniarnermut Nunalerinermullu Naalakkersuisoqarfik, + 299 553342, Amalie@nanoq.gl

Ataatsimoorlutik nalunaarut

Tuluttooq