Innuttaasunik ataatsimiititsinerit

Matumuuna Naalakkersuisut Qeqqata Kommuniani innuttaasut soqutiginnittut Hudson Resources-ip Qaqortorsuarmi Anorthosit-eqarfimmi piiaanissamut qinnuteqaataanut tunngatillugu innuttaasunik ataatsimiititsinissanut qaaqquaat.

Innuttaasunik ataatsimiititsinerit ulluni ukunani sumiiffinni makkunani ingerlanneqassapput:

Ulloq Piffissaq Illoqarfik/nunaqarfik Sumiiffik 
8. maj Nal. 12.30 - 15.30  Kangaamiut Katersortarfik 
8. maj  Nal. 19.00  Maniitsoq  Hotel Maniitsoq
9. maj  Nal. 11.30 - 14.30  Itilleq  Katersortarfik 
9. maj  Nal. 19.00  Kangerlussuaq  Timersortarfik
10. maj  Nal. 11.00 - 14.00  Sarfannguit  Katersortarfik 
10. maj  Nal. 19.00  Sisimiut  Aatsitassalerinermik ilinniarfik 

Tamanut ammasumik innuttaasunik ataatsimiititsinerit, tusarniaanermut najoqqutassat tamanut saqqummiunneqarnerannut aammalu Namminersorlutik Oqartussat nittartagaanni tamanut ammasumik tusarniaassutigineqarnerannut atatillugu, pisortanit ingerlanneqassapput. 

Suliassap saqqummiunneqarnissaanut tamatumalu kingorna suliassamik pigisaqartunut, oqartussaasunut aammalu suliassaqarfimmi immikkut ilisimasalinnut arlaannaannulluunniit attuumassuteqanngitsunut apeqquteqarnissamut innuttaasut periarfissinneqarnissaat siunertaralugu, innuttaasunik ataatsimiititsinissat aaqqissuunneqarput. 

Qeqqata Kommuniani borgmesteri Hermann Berthelsen, Qeqqata Kommuniani borgmesterip tullia aamma aatsitassanut attaveqarnermullu ataatsimiititaliami siulitaasoq Gedion Lyberth, Aningaasaqarnermut Aatsitassanullu Naalakkersuisoq Andreas René Uldum, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aamma Avatangiisinut, Pinngortitamut Inatsisinillu Atuutsitsinermut Naalakkersuisoq Mala Høy Kúko, kiisalu Århus Universitet-imi Nationalt Center for Miljø og Energi-mit, Pinngortitaleriffimmit aamma Hudson Ressources-imit aallartitat peqataassapput.

Innuttaasunik ataatsimiititsinerit kalaallisut danskisullu ingerlanneqassapput.

 

Inussiarnersumik inuulluaqqusillunga

Andreas René Uldum
Vittus Qujaukitsoq
Mala Høy Kúko