Takornariartitsinermik inuussutissarsiorfimmi alloriarnerit pingaarutillit

Sapaatip akunnerani maani Inatsisartut siunnersuut qitiusut marluk akuersissutigaat. Ukioq maannamiit Kalaallit Nunaata umiarsuarnik takornariartaatinut sinaakkutissat pitsanngorsariissagaat tamannalu isumaqarpoq, umiarsuarni takornariartaatini ilaasunut akitsuutip allanngortinneqarnera, maannakkut Islandimi inissisimaffiusumut appartinneqarluni.

Kalaallit Nunaata unammillersinnaassusaa nukittorsartariaqarparput, ukiuni kingulliunerusuni umiarsuarni takornariartaatini ilaasut ikileriarnerat naapinniassagutsigu, Inuussutissarsiornermut, Suliffeqarnermut Niuernermullu Naalakkersuisoq Vittus Qujaukitsoq oqarpoq, nangipporlu; akitsuutit appartinnerat taanna alloriarnerit siullersaraat, ukiullu ingerlanerani kingusinnerusukkut takornariartitsinermut periusissiap takkuttussap ilaattut iliuusissatut pilersaarummik malitseqartinneqarumaarpoq.

Piffissami matumani takornariartitsinerup ineriartortinnissaanut sinaakkutissatut piumasaqaatit Naalakkersuisut sammisupilussuuaat. Aamma takornariartitsinermik suliaqarnerni akuersissutit pillugit inatsisit marluk kattunneri – tassalu takornariartitsinermik akuersissuteqarnermut inatsit aamma sukisaarsaatigalugu aalisarnermut akuersissutit pillugit inatsit maannakkut naammassillugit oqaluuserineqareerput. Maannakkut takornariartitsinermut akuersissutisinissamut kattussamik ataatsimik inatsiseqalerneranik tamanna nassataqartitsivoq, tamannalu qinnuteqartunut aqutsinermik annertuumik oqilisaavoq.

Takornariartitsinermik akuersissutinut nunaminertanik atugassiineq takornariartitsinerup ineriartortinnerani aningaasaliinernut kajungersaanermut pingaarutillit ilaattut isigaara, Vittus Qujaukitsoq oqarpoq, nangipporlu; aningaasaliisartut aningaasaliissutitik sapinngisamik pitsaanerpaamik qulakkeerneqarnissaanik kissaateqartarnerat pissusissamisoorpoq, tamannalu takornariartitsinermik akuersissuteqarnermut periarfissaqassaaq. Maannakkut kommunit pilersaarutaanni neqeroortitsissutaasinnaasunik nunaminertanik atugassiinissaq kommunit suliassarilerpaat.


Inuussutissarsiornermut, Suliffeqarnermut, Niunernermut Nunanullu Allanut Tunngasunut Naalakkersuisoq Vittus Qujaukitsumit ilassutissanik oqaaseqaatissanik pissarsiniaruit naalakkersuisumut allatsi attavigiuk Thomas Kjærgaard +299 58 08 58 e-mail thkj@nanoq.gl.