Peqqinnissamik suliniutit 42-t Inuuneritta Aningaasaliissutaanit taperneqarput

Peqqissutsimut Naalakkersuisoq, Martha Lund Olsen, Inuunerittamut Aningaasaliissutinik 404.000 kr.-inik pinaveersaartitsiniarluni aamma peqqinnerulersitsiniarluni suliniutinut aningaasaleeqqammerpoq.
Ukioq manna aningaasaliissutinik qinnuteqartut 97-iupput.

Meeqqat, inuusuttut ilaqutariillu peqqissusaannut inuunerinnerulernissaannullu suliniutit ukioq manna sammineqarput, suliniutit timimik aalatitsinerulernissamik kajumissaarisut aamma suliniutit imigassamik, hashimik imminullu toqunnissamik pinaveersaartitsiniaqataasut.

-”Nuannaarutigeqaara, amerlasuut sumiiffinni nukiit, nunatsinni innuttaasunik peqqinnerulersitserusullutik sulerusummata. Inuunerittap Aningaasaliissutaanik tapertinnikkut suliniutit pitsaasut illoqarfinni nunaqarfinnilu piviusunngorsinnaalerput” oqarpoq Peqqissutsimut Naalakkersuisoq, Martha Lund Olsen nangillunilu:

-”Suliniutit pitsaasut ilarpassuisa toqqaannartumik Paarisap paasititsiniutaa ”Inuusuttuuneq pakkutsigu”-mut tapertaapput, tassami inersimasut meeqqat inuusuttullu peqqissusaannut akisussaaneroqqullugit sammisaqaqatigiinnerunikkut, peqataanerunikkut oqaloqatigiinnerunikkullu kajumissaarneqarmata. Oqariartuutini pingaarnertut qitiuvoq ilisimatusarnermit paasisat, qanoq inuusuttut aanngajaarniutinik atornerluinissaraluat pitsaaliorneqarsinnaanersoq.”

Ukioq manna inuiaqatigiit peqqissuunissaannut pilersaarut Inuuneritta II-mi timip aalatinnerunissaa suliniutaavoq. Aningaasaliissutinik taperneqartut suliniutit uku iluanniipput:

  • Timimik aalanerulernissamik: Maaji Nuan, timigissarluni atortorissaarutit, sisoraatit il.il.
  • Nunat assigiinngitsut akornanni meeqqat inuusuttullu Ittoqqortoormiuni asiarnerat
  • Meeqqat silami soorlu arpattagiarneq, qallorneq aamma isikkamik arsaannermik sammisassaqarnerunissaannik suliniutit.

Inuuneritta Aningaasaliissutaanut qinnuteqarfissaq tulleq tassaavoq 1. april 2016. Ukiup tulliani sammineqassaaq nerisaqarneq. Qinnuteqarnissamik immersugassaq paasissutissallu annertunerusut nassaarikkit www.peqqik.gl/inuuneritta

Annertunerusumik paasisaqarusukkuit attavigikkit: Peqqissutsimut Siunnersorti Lisa Christiansen tlf: +299 34 66 50, e-mail: lich@nanoq.gl aamma Paasissutissalerisoq Aqissiaq Møller Mathiassen tlf: +299 346690, e-mail: aqma@nanoq.gl