Naalakkersuisut whistleblowerimik aaqqiissutaat nutaaq

Eqqarlit iluanaaqutissiisarunnaarneq annertunermillu tamanik takunnissinnaaneq. Tassaapput ullumikkut Naalakkersuisut ataatsimiinnerminni akuerisaanni Naalakkersuisut whistleblowerimik (eqqunngitsuliortunik oqaatiginnittartunik) aaqqiissutaasa nutaap anguniagarisai.

Suleqataasup arlaat unioqqutitsisoq naammattooruniuk taanna IT-kkut aaqqissuussivik aqqutigalugu imminerminillu isertuilluinnarluni Aningaasaqarnermut Sulisorisanullu Aqutsisoqarfimmut saaffiginnissinnaaneranik piviusutigut tamanna isumaqarpoq. Saaffiginninneq kingornatigut misissueqqittoqassaneranut tunngavissaqarnera paasiniarlugu nalilersorneqassaaq. Taama pissappat suliassaq naalakkersuisoqarfiup pisortaata tigussavaa, taannalu paasissutissaq nassiussaq tunngavigalugu misissuinermik aallartisaassaaq.

”Allattoqarfimmi suliat unioqqutitsisuusinnaasut pillugit kinaassutsimik isertuilluni sulisorisat paasissutissanik ingerlatitseqqinnissamut periarfissiisut ullumikkut whistleblowerimik aaqqiissutip eqqunnissaata aalajangiukkatsigut Namminersorlutik Oqartussani tamanik takunnissinnaanerup tungaanut siuariarnerujussuuvoq”, Aningaasaqarnermut Aatsitassaqarnermullu Naalakkersuisoq Anda Uldum iluarinnilluni oqarpoq, erseqqissarpaalu Namminersorlutik Oqartussani allattoqarfimmi unioqqutitsisumik suliaqartoqarneranik pasillersimannginnini.

Whistleblowerimik aaqqiissut tassaavoq sulisorisat periarfissat sinnerinut atugarisinnaasaannut ilassutaasoq. Ilaatigut matumani eqqarsaataapput sinniisinik aaqqissuussiffik imaluunniit isumannaallisaanermut suleqatigiinnermullu aaqqissuussaq.

Whistleblowerimik aaqqiissutip eqqunnissaa pillugu Naalakkersuisut neriorsuutigisami piviusunngortissaneraat nalornissutigisaasoq marlunngorneq 24. april radioaviisimi Transparency International Greenland naapertorlugu oqaatigineqarpoq.

Oqaaseqaat Naalakkersuisut tupigusuutigaat, whistleblowerimik aaqqiissummut siunnersuut tusarniaassutaasimammat – aamma Transparency Greenlandikkunni.

 

Annermik paasissutissat: Attavigiuk tusagassiorfinnut ataqatigiissaarisartoq Martin Christiansen, mobil: 221533