Issittumi uumassusillit assigiinngisitaarnerat pingaaruteqarpoq

Issittumi uumassusillit assigiinngisitaarnerat pingaaruteqassussaa Nunani avannarlerni ministerit akueraat

Pinngortitamut, Avatangiisinut Inatsisinilli Atuutsitsinermut Naalakkersuisoq Mala Høy Kúko, Nunani avannarlerni Avatangiisinut ministerit siunnersuisooqatigiiffianni nunani avannarlerni ministerit suleqatini siullermeertumik ataatsimeeqatigeqqammerpai. Ataatsimiinneq Københavnimi Nationalmuseet-imi ataasinngorneq ulloq 27. april ingerlanneqarpoq.

Kalaallit Nunaata iliuuseqarneratigut Issittumi Siunnersuisooqatigiit nalunaarusiaat ’Issittumi uumassuseqarnerup assigiinngisitaaneranik naliliineq’ (EAB), Issittumi pinngortitap qanoq issusaanik ineriartorneranillu eqikkaaffiusoq, nunani avannarlerni avatangiisinut ministerit oqallisigaat. Nalunaarusiami oqariartuutaasut pingaarnerit ilaat tassaavoq, silap pissusaata allanngoriartornera ingerlasoq Issittumi pinngortitamut navianartorsiortitsisuni annerpaajusoq. Peqatigisaanik Issittumi pinngortitamik allanngutsaaliuinermik suliaqarneq pisuussutinik uumassusilinnik piujuartitsisussamik atorluaanermut ataqatigiissillugu ingerlanneqarsinnaanersoq, nalunaarusiami inassuteqaatit arlallit saqqummiunneqarput.

Oqallinnerit nunani avannarlerni avatangiisinut ministerinit ataatsimoorluni politikkikkut oqaaseqaateqarnermik inerneqarput, ilaatigut Issittumi Siunnersuisooqatigiinni inassuteqaatit malitseqartinneqarnissaannut iliuusissanut pilersaarummik suliaqartoqarsimanera annertoorujussuarmik iluarisimaarneqartoq oqariartuutigineqarluni. Oqaaseqaatit nassaarineqarsinnaapput uani Nordens hjemmeside.  

Naalakkersuisup Mala Høy Kúko-p nunani avannarlerni suleqatini nalunaarusiap malitseqartinneqarnissaa pillugu tapersersuimmata nuannaarutigaa:

”Nunani avannarlerni ministerit suleqatikka peqatigalugit pinngortitami, avatangiisini aamma silap pissusaanut suliassaqarfimmi ataatsimoorluta unammilligassatta annertuut ilai oqallisigaakka. EAB-imik malitseqartitsinissaq pillugu oqallinnerup erseqqissarpaa, issittumi uumassusillit assigiinngisitaarnerisa pingaaruteqarnerata akuerinissaa Nunani avannarlerni ataatsimoorfigigipput, aammalu Issittumi Siunnersuisooqatigiinnit pinngortitamut iluaqutaasumik iliuusissanut pilersaarutip piviusunngortinnissaa pingaartikkipput”.

Nunani avannarlerni Ministerinut siunnersuisooqatigiinnut siulittaasoqarfiuneq nunani avannarlerni nunat akornanni ingerlaartarpoq. Ukioq manna Kunngeqarfik Danmark siulittaasoqarfiuvoq. Danskit siulittaasoqarfiunerat Savalimmiut aamma Kalaallit Nunaat oqaloqatigalugit pilersaarusiorneqarpoq. Kunngeqarfik Danmarkip siulittaasoqarfiuneranut pisussanut pilersaarummi sammisat pingaartinneqartut sisamat ilaat tassarpiaavoq Issittoq.

Issittumi Siunnersuisooqatigiit nalunaarusiaannit ’Issittumi uumassuseqarnerup assigiinngisitaaneranik naliliineq’ eqikkaaneq Naalakkersuisut nittartagaanni kalaallisutdanskisut aamma tuluttut nassaarineqarsinnaavoq.

Avatangiisinut ministerit ataatsimiinnissaat sioqqullugu Naalakkersuisoq Mala Høy Kúko aamma Avatangiisinut ministeri Kirsten Brosbøl immikkut ataatsimiillutik naapeqatigiipput.

”Danskit avatangiisinut ministeriata Kirsten Brosbøl-ip ataatsimeeqatiginerani ministerimut erseqqissarpara, pinngortitami qimaannakkat  ilungersuunniakkama ilagigaat. Nunatsinni pinngortitami asseqanngitsumi sakkutooqarfitoqqani qimaannakkat tamaaniinnarmiinnerat – avatangiisinik eqqumaffiginninnginnermik akisussaassuseqannginnermillu eqqunngilluinnartumik takutitsisussaavoq”, oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

 

Paasissutissanut annertunerusunut tunngatillugu Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi immikkoortortaqarfimmi pisortaagallartoq Pernille Møller attaveqarfigineqarsinnaavoq uani +45 51355370.