Naqqiut

Aviisimi Sermitsiami tallimanngornermi 24. april 2015 saqqummersumi allaaserisat arlallit NunaMineralsimut aamma Namminersorlutik Oqartussat selskabip suliaasalu akiliisinnaajunnaarnermit annaateriarnissaannut iliuuserisimasaat allaaserineqarput. Ilisimaneqareersutut NunaMineralsimi siulersuisut sapaammi 19. april 2015 akiliisinnaajunnaartutut nalunaarumalluni qinnuteqarput.

Kukkunerit taamaassorinninnerit ajorluinnartut allaaserineqarput, atuartartumut paatsoornermik pilersitsillutik Namminersorlutillu Oqartussat NunaMineralsimik annaasseriarnernut peqataasimanerannut kukkusumik isumaqalersitsillutik.

NunaMineralsip aningaasaqarnikkut ajornartorsiorluinnarnera 2014-imi ukiakkut paasineqarmalli ajornartorsiutinik qaangiiniarnissamut NunaMineralsip avataani Namminersorlutik Oqartussat kiserluinnarmik NunaMinerlasimik ikiuiniarsimappput.

Siullermik piaartumik akiligassanik 4,5 mio. kr.-nik taarsigassarsititsisoqarpoq, taamaalilluni siulersuisut NunaMineralsip siunissami ataannarnissaanut eqqissillutik pilersaarusiorsinnaalerlutik. Piginneqataasut akiligassaqarfiillu allat iliuuseqanngillat, taamaallaat utaqqipput susoqarnera malinnaaffigalugu.

Tullissaatut selskabip ataannarnissaanut iliuusissamik saqqummiipput, tamannalu siulersuisut immikkut ittumik ataatsimeersuarnermi 29. januar 2015 piginneqataasunut saqqummiuppaat. Pilersaarutip akuerineqarnissaanut piginneqataasut akornanni amerlanerussuteqartoqanngilaq. Ilisimaneqareersutut Namminersorlutik Oqartussat ikinnerussuteqartumik piginneqataassuteqarput, taamalu aalajangiinerni aalajangiisuusinnaanatik.

Piginneqataasut arlaannaalluunniit siunnersuuteqanngilaq. Selskabimi ataatsimeersuarnermi siulersuisut siunnersuut alla selskabip aningaasalersoqqinnissaanut siulersuisut piginnaatinneqarnissaannik imaqartoq saqqummiuppaat, tamannalu Namminersorlutik Oqartussanit taperserneqarpoq. Killilimmilli taanna akuerineqarpoq. NunaMineralsimi siulersuisut ataatsimeersuannginnermi pissutsit asserluinnaaneeqqilerput. Aningaasaqanngilaq, pilersaaruteqanngilaq, aaqqiissutissaqanngilaq.

GMM

Namminersorlutik Oqartussanit NunaMineralsimut taarsigassarsiat 4,5 mio. kr.-it 1. februar 2015 akilerneqartussaapput. Akileeqqussutilli nassiunneqaralaluartut akiliisoqanngilaq. Taarsiullugu selskabip Greenland Mining Managementip (GMM) annaassiniarnissamut pilersaarusiornissamut piffissaliisoqarnissaanik saaffiginnissutaa NunaMineralsimi siulersuisut ingerlateqqippaat. Tamanna Namminersorlutik Oqartussanit tigulluarneqarpoq GMM-imillu oqaloqateqarneq siunnersuutit siulliit GMM-imit tunniunneqarneraniilli ingerlasimavoq. GMM-imit isumassarsiat Namminersorlutik Oqartussanit soqutigineqarlutik misissorneqarsimapput oqaaseqarfigineqartarsimallutillu. Tamannarpiaq pissutigalugu taarsigassarsiat taarsigassiinermi isumaqatigiissutaasut malillugit akilertinneqarnissaat unitsikkallarneqarsimavoq.

Siunnersuummilli erseqqissumik atasinnaasumillu saqqummiussisoqanngilaq. Oqaloqatigiinnerni illua’tungeriinnit isumaqatigiinngissutit erserput. Assersuutigalugu GMM-imit piumasaqaatit ilaat inatsisinik unioqqutitsisutut Namminersorlutik Oqartussanit nalilerneqarpoq. Tamanna GMM-imut erseqqissumik arlaleriarlunilu erseqqissaatigineqarpoq. Akerlianik Namminersorlutik Oqartussanit tunngaviusumik piumasaqaatit aalajangiusimaffigineqartut GMM-imit naammassineqarusunngitsut GMM-imit uppernqarsineqarpoq.

Poorski sioqqullugu pissutsit ima inissisimapput, januaarimi ataatsimeersuareernermi qaammatit marluk qaangiunneranni NunaMinerals suutaarulluinnaqqasoq. Nalileeqqissaartoqareersoq inatsisilerituunillu siunnersorneqareerluni Namminersorlutik Oqartussat poorsip kingorna ilisimatitsivoq GMM-ip isumassarsiai NunaMineralsimik annaassiniarnermi tunngaviusumik attassisinnaanngitsutut. Erseqqissaatigaarput inatsisit qaangerlugit aaqqiissuteqarniarnernut peqataasinnaanata. Tamanna allakkatigut GMM-imut 16. april 2015 ilisimatitsissutigaarput, kingornalu tusagaqarfiginngilarput.

Taamaammat tupaallannarlunilu uppernassuseqanngilaq Sermitsiap GMM issuarmagu ”taamatummi isumaqanngilagut”, GMM-immi piumasaqaatini arlaleriarluni allaganngorlugit Namminersorlutik Oqartussanut tunniuppaat.

Ilanngullugu oqaatigeqqissavara NunaMineralsip ajornartorsiorneranit qaangiisitsinissamut ilisimasakka naapertorlugit Namminersorlutik Oqartussat kisimik aningaasatigut ikiuisimammata, isumagalu naapertorlugu Namminersorlutik Oqartussat GMM-imut naammagittarsimaqaaq.

Kisianni tassa ingerlatsinermi aaqqiissutissarsinissamut takussutissaqanngitsoq naliliigaanni, pissusissamisoorluinnarpoq illua’tungeriit qanoq inissisimarpiarnerat isiginiassallugu.

GMM-ip pilersaarutaa taamak isikkoqartillugu siunissaqanngitsoq Namminersorlutik Oqartussat inatsisitigut ikiorneqareerluni qularinngilluinnarpaat. Taamaakkaluartorli eqqaamaneqassaaq ammasumik naammagittarluta soqutiginnillutalu GMM-ip NunaMineralsimik atasinnaasumik annaasiniarnissamut pilersaarusiorsinnaanersoq malinnaaffigigatsigu, GMM-illu pilersaarutaanut apeqqutit piginneqataasunut, akiligassaqarfimmut NunaMineralsimillu soqutigisaqartunut allanut minnerapaamik akissutigineqarsinnaasariaqartut apeqqutigisimavavut.

Kores

Koreami Kujallermi selskabip Koresip Namminersorlutik Oqartussanut 17. april 2015 allakkiaa Sermitsiami allaaserisami oqaatigineqartoq pillugu oqarusuppunga NunaMineralsip ataannarnissaanut Koresillu Qeqertaasami suliniummut aningaasaliissutaata annaannginnissaanut ikiuiniarlutik Namminersorlutik Oqartussat iliuuseqarsimammata. Kores ataatsimeeqatigaarput Qeqertasamilu suliniummut aningaasaliissutit iluaqutiginissaannut periarfissarsiorlugit selskabi ikiorniarlugu neqeroorfigineqarpoq. Selskabi suli ikiorusullugu aamma neqeroorsimavugut, soorunalimi inatsisitit atuuttut iluanni..

Koresip allagaanut tunngatillugu apeqqutinut peqqissaarluta akissutivut tusagassiortumut tunniussivissamut killiliussaq siusinaarluarlugu nassiuppakka. Akissummi Qeqertaasami suliniummit aningaasaliissummit ajunngitsumik aninissaq pillugu Koresimut ikiuukkusunnerput aammaloorlugu allagaqaatigineqarpoq. Taamaattorli Koresimut allakkavut aaqqissuisoqarfimmit pigineqartut Sermitsiamit eqqaaneqanngillat, akissutivullu tusagassiortutut isiginiarneqarsimanatik.

Worthington Group

NunaMineralsimik annaassiniarnernik oqaluttuat allaaserisamik aamma ilaqarput paasissutissanik Sermitsiamut ilisimatitsissutigineqarsimasunik ilaqanngitsunik. Tassalu Worthington Groupip annaassiniarluni saaffiginnissutaanik iliuuseqarsimanngitsungagooq akerliuniarlungalu soqutiginnissimanngitsunga. Aaqqissuisoqarfimmilu inerniliunneqarpoq NunaMineralsip akiliisinnaanngitsutut nalunaarumalluni qinnuteqarneranut uanga pisuusunga.

NunaMineralsimi siulittaasorlu tallimanngornermi 17. april e-mailikkut allaqatigiinnermit ilisimatitsissutigisinnaavara:

  • NunaMineralsimi siulittaasumit ilisimatinneqarpunga tuluit selskabiat alla aningaasaliinissamut piginneqatigiiffik Worthington Group NunaMineralsimut saaffiginnissuteqarsimasoq. Saaffiginnissut uannut ilisimatitsissutitut ingerlateqqinneqanngilaq taamatut isikkoqartillugu ingerlateqqinneqannginnissaa siulersuisut aalajangermata,
  • Siulittaasumut ingerlaannaq uppernarsarpara ilisimatitsissutaa tigusimallugu,
  • Siulittaasup ilisimatitsissutaa Worthington Groupimit nutaamik siunnersuusiortoqarnissaanik ilimasaarutitut isigaara. Sermitsiamut soorlu oqaatigigiga NunaMineralsip siulittaasuanit ilisimatitsissut ima nipeqarpoq, Worthington Groupimit saaffiginnittoqarnissaanik naatsorsuuteqarsinnaasugut.

Ilisimasakka naapertorlugit NunaMineralsimi siulersuisut susoqarneranik uattut paasinnipput: – siulittaasup uannut allagaa takkuttoqarumaarsinneranik ilisimatitsinerusoq uanniillu naatsorsuutigisaqartoqanngitsoq, taamaallaalli Worthington Groupimit siunnersuuteqartoqassappat Namminersorlutik Oqartussat tamassuminnga isummerumaartut. Takkukkumaartussat aamma taamatorluinnaq iliuuseqarfiginissaat siunertarisimavara, tamannalu siulersuisut naammagisimaarpaat.

Saaffiginnittoqanngilarli. NunaMinerlasimit Worthington Groupimillu. Tusagassiortup eqqoriaaneratut uannik tusagaqarsimannginnermik kisianni tunngaveqanngilaq. Allamik ajornannginnerusumillu pissuteqarpoq.

Ilisimasakka naapertorlugit Worthington Groupimit siunnersuut NunaMineralsimi siulersuisunit siunissaqarsorineqarsimanngilaq. Taamaammat oqaluttuaq taanna tamaanga naavoq.

Arajutsineqarsimappat, Namminersorlutik Oqartussat piffissaq ajornartorsiorfiusoq tamaat NunaMineralsilu  ajunngilluinnartumik attaveqaqatigiipput, selskabillu annaanniarnissaanut ikiuunnissaq Namminersorlutik Oqartussanit siunertarineqartuarsimavoq.

 

Søren Hald Møller
Naalakkersuisoqarfimmi pisortaagallartoq
Naalakkersuisut Siulittaasuata Naalakkersuisoqarfia