Sapaatip akunnerata 18-ip siunertaa

Ukiut tamaasa sapaatip akunnerani 18-imi imigassamik aanngajaarniutinillu atornerluinermut pitsaaliuiniarnernut tunngasunik sammisaqartitsisoqartarpoq. Innuttaasut, peqatigiiffiit, atuarfiit, pitsaaliuinermi ataatsimiititaliat kommunillu tamarmik kaammattorneqartarput sapaatip akunnerani 18-imi najukkaminni aaqqissueqqullugit, soorlu sammisaqarfiusunik aaqqiissusinikkut imaluunniit innuttaasunik oqallitsitsinikkut. Kikkulluunniit sapaatip akunnerani 18-imi aaqqissuusserusuttut Peqqissutsimut Naalakkersuisoqarfimmut aningaasanik qinnuteqarsinnaapput. Lisa Christiansen, Peqqissutsimut Naalakkersuisoqarfimmi imigassamik aanngajaarniutinillu atornerluinermut pitsaaliuinermik sulianut tunngasuni siunnersortitut atorfilik, ukioq manna sapaatip akunnerata 18-ip siunertaa ”Inersimatut akisussaaffik” sapaatillu akunnerani pisussat pillugit ilisimatitsivoq.

Lisa Christiansen:- Illoqarfiit nunaqarfiillu tamarmik sapaatip akunnerani 18-imi aaqqissuussaqarniarunik aaqqissuussinernut aningaasartuutinut matussutissanik qinnuteqarnissaminnut periarfissaqarput. Aaqqissuussinerit oqallitsinerusinnaapput, arpatsitsinerusinnaapput peqqinnarnerusumilluunniit inuuneqarnissaq anguniarlugu sammisaqartitsinerusinnaallutik.

Tassa illoqarfiit nunaqarfiillu tamarmik sapaatip akunnerani 18-imi pisoqarfiussapput?

Lisa Christiansen:- Illoqarfiit 15-it nunaqarfiillu 25-t sapaatip akunnerani 18-imi sammisassaqartitsinissamik siunertanut tapiiffigeqqullutik qinnuteqarnikuupput. Illoqarfiit nunaqarfiillu sinneri qinnuteqarnikuunngikkaluarlutik imaassinnaavoq aamma sammisaqartitsiumaassasut.

Sapaatip akunnera 18 quleqataqartinneqartuaannarpoq, ukioq manna qulequtaq suua?

Lisa Christiansen:- Ukioq manna sapaatip akunneranut 18-imut qulequtaritinneqarpoq ”Inersimasutut akisussaaffik”. Qulequttamut tassunga tunngaviutipparput Islandimi meeqqat inuusuttuaqqallu imigassamik aanngajaarniutinillu atuisunngunnginnissaannut pissutsit suut pitsaaliueqataasarnersut pillugit misissuisimanerit. Misissuinerit taakkua takutippaat meeqqat inuusuttuaqqallu ilaquttaminnik ullormut minnerpaamik akunnermi ataatsimi sammisaqaqateqartarnerat oqaloqateqartarnerallu imigassamut aanngajaarniutinullu saannissaraluannut pitsaaliueqataasartoq. Misissuinerit taakkua aamma takutippaat Islandimi meeqqat inuusuttuaqallu sunngiffimminni timersornermik sammisaqartarnerat imaluunniit aaqqissuussanut allanut peqataasarnerat imigassamik aanngajaarniutinillu saannissanut pitsaaliueqataasartut. Taamatuttaaq angajoqqaat meeqqaminnik isumaginilluarnerat isumassuilluarnerat, oqaloqatiginnilluartarnerat, piffissaqarfiginnittarnerat, killiliisarnerallu meeqqat imigassanut aanngajaarniutinullu atuisunngujaarnissaraluannut pitsaaliueqataasartoq.

Tassa qulequtaq tamanna sinerissami tamarmi sammisaqartitsinernut tunngaviussaaq?

Lisa Christiansen:- Aap. Sapaatip akunnerani 18-imi TV-kkut paasititsiniinerput inersimasut akisussaaffiannik aamma imaqartoq aallartissaaq.

Nuummi illoqarfinnilu pingaartumik ilinniarfeqarfiusuni nunaqarfinnilumi pisussat soorlu suussappat?

Lisa Christiansen:- Nuummi kommunip suleqataaffigisaanik pisussat saqqummiunneqarnikuummata oqaluttuarisinnaavakka. Sapaatip akunnera 18 aallernerlugu kattuffik Neriuffiup aaqqissuussaanik ataasinngorpat ualikkut nal. 15:00-imiit Ole´s Varehusitoqqamiit pisoqatigiittoqassaaq. Meeqqat inuusuttullu ornittagaanni Nuif-fimi pisoqassaaq, kiisalu imigassamut aanngajaarniutinullu pitsaaliunermi siunnertit angajoqqaanut tamanut 7. klassemi atuartuutilinnut oqallitsitissapput. Aamma Nuummi innuttaasut Illorput-mi marlunngorpat 28. april unnukkut arfineq marluniit oqallitsinneqassapput. Blå Korsit pingasunngorpat 29. april unnukkut nal. 19:00 aaqqissuussaqarput qulequtsersimasaminnik ”Isitit ammakkit eqqartuillutillu”. Blå Korsit quppersaganngualiortitsisimapput, meeqqanik ilaqutariinni atornerluiffiusuneersunik qanoq ililluni ikiorsiisinnaanermik imalimmik. Sisamanngorpat 30. april, Nuif-fimi isiginnaartitsisoqassaaq peqataasullu IPhonemik eqquisinnaassappunngooq.

Siuliani oqarputit tv-kkut paasititsiniaanermik ingerlatsisoqassasoq?

Lisa Christiansen:- Aap, paasititsiniaaneq sapaatip akunnerata matuma siulianili aallartippoq. Tv-kkut takutitassiannguit SPOT-it atorneqarput. SPOT-it ilaanni meerartatta pingaarnerpaatut pisuussutaanerat taamaammallu paarilluartariaqarnerat ersersinniarneqassaaq. Sapaatip akunnerani 18-imi tv-kkut SPOT-tigut takutinneqassaaq meerartagullu ullormut minnerpaamik akunnermi ataatsimi sammisaqaqatigiittarnissatta iluaqutaassusia. Tv-kkut SPOT-it taakkua sapaatit akunnerisa arfineq pingasut ingerlaneranni takutinneqartassapput.

Tusagassiivimmit Else Olsvig Lisa Christiansenik apersuisuuvoq.