Nunarput Meeqqanik Illersuisortaarpoq

Aviâja Egede Lynge Naalakkersuisunit Nunatsinni Meeqqanut Illersuisuattut toqqarneqarpoq. Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaat nr. 11, 22. november 2011-meersoq naapertorlugu, Aviâja Egede Lynge ukiuni pingasuni atuuttussatut 1. juni 2015-miit atuuttussanngorlugu Naalakkersuisunit toqqarneqarsimavoq.

Aviâja Egede Lynge-p taarserpaa Aaja Chemnitz Larsen, nunatsinni Meeqqat Illersuisuatut siullersaalluni atuussimasoq. Aaja Meeqqanut Illersuisutut marts 2012-miit marts 2015-p tungaanut atuunnikuusimavoq.

Meeqqanut Illersuisutut atorfillip meeqqat inuusuttuaqqallu pisinnaatitaaffii soqutigisaallu aallaavigalugit sulisussaavoq, meeqqallu soqutigisaat tunngavigalugit pisinnaatitaaffiinik qaammarsaasussaalluni. Meeqqat aqqutit suut atorlugit naamagittaalliuteqarsinnaanersut tamatigullu isummaminnik tusaaniarneqartarnissaat qulakkeerinninniaqataaffigisartussaavaa.

Meeqqanut Illersortip pisinnaatitaaffigivaa Meeqqanut Illersuisup pisinnaatitaaffiata iluani sukkulluunniit oqaaseqaateqartarnissamut. Nammineq naliliinini toqqammavigalugu imaluunniit allanit saaffigineqarsimanini toqqammavigalugu killilersorneqarani oqaaseqarsinnaatitaalluni. Tamatuma saniatigut pineqartoq Meeqqat pillugit Siunnersuisoqatigiinnut siulittaasuuvoq. Meeqqat sinnerlugit oqaaseqartartuullunilu pisinnaatitaaffiilu pillugit illersuisuulluni.

Meeqqanut Illersuisup pisortaaffigivaa politikkikkut naqisimaneqarani sullissivik MIO – Meeqqat Inuusuttullu Oqaloqatiginnittarfiat.

Nuannaarutigaara Meeqqat Illersuisuattut tatigineqarlunga toqqarneqarsimanernut. Uannut pingaaruteqartuuvoq meeqqat isiginiarneqarlutillu tusaaniarneqartarnissaat. Meeraq kinaluunniit inuttut kinaassutsini aallaavigalugu pisinnaatitaaffeqarpoq – aammalu meeqqat tamaasa inissaqartittussaavagut, apeqqutaatinnagu kikkuunersut qanorlu ittuunersut”, taamak oqaaseqarpoq Aviâja Egede Lynge, Nunatsinni Meeqqanut Illersuisutut pisortatigoortumik oqaaseqaqqaarnermini.