Kalaallit Issittumi Siunnersuisooqatigiit ataatsimiinneranni

Issittumi Siunnersuisooqatigiinni ministerit ulloq 24. april ataatsimiinneranni Kalaallit Nunaata peqataanera.

Ulloq 24. april 2015 Issittumi Siunnersuisooqatigiinni ministerit Nunavut-mi Iqaluit-ni ataatsimiissapput. Tassani Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq peqataassaaq.

Ministerit, ilanngullugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq, Issittumi Siunnersuisooqatigiit ukiuni aggersuni marlunni amerikamiut siulittaasoqarfiuneranni pingaartitassaat isummerfigissavaat, taamatullu Canadamiut siulittaasoqarfiat siulittaasoqarfiujunnaaqqammersoq, aammalu siulittaasoqarfiunerisa nalaanni suliniutaasimasut nalilersorneqassallutik.

Ataatsimiinnermi siulittaasoqarfik Canadamiit USA-mut, ukiut tulliuttut marluk siulittaasuusussamut, tunniunneqassaaq. Ministerit nalunaarutaat kiisalu nalunaarusiaq taaneqartartoq Senior Arctic Officials, ataatsimiinnermi akuersissuteqarfigineqassapput. Allakkiat marluk taakkua ilaatigut ukiunut tulliuttunut suliaqarnermut pilersaarutinik imaqarput.

Sammisassat Naalakkersuisut tungaanniit ukiuni tulliuttuni aallunneqarumasut ilaatigut tassaapput imaani sumiiffiit, avatangiisit, silap pissusaata allanngorneri, eqqarsartaatsikkut peqqissuseq.

 

 

Annertunerusunik paasisaqarusunnermi attaveqarit aqqutigalugu: Pisortaq Kai Holst Andersen, Nunanut Allanut Pisortaqarfik, Oqarasuaat angallattagaq nr.: 55 33 31