NunaOil A/S aningaasaqarnikkut nukittuvoq

Naalakkersuisut Siulittaasuat Kim Kielsen NunaMineralsip akiliisinnaajunnaartutut nalunaarumalluni qinnuteqaataa pillugu Qanoruumi ataasinngornermi 20. april 2015 apersorneqarmat aperineqarpoq akiliisinnaajunaarnerit siunissami pinngitsoortinniarlugit qanoq iliuuseqartoqarniarnersoq. Apeqqummi NunaMineralsip akiliisinnaajunnaarnera NunaOil A/S-ip ilumuunngitsumik akiliisinnaajunnaaqqajaanerarlugu assersuunneqarput.

Naalakkersuisut Siulittaasuata Kim Kielsenip erseqqissaatigerusuppaa NunaOil A/S selskabitut aningaasaqarnikkut nukittummat, aningaasaqarnikkut arlaannaatigulluunniit ajornartorsiuteqanngitsoq.

”Ajuusaarutigaara NunaMinerals A/S-ip siunissaata qularnaarnissaanut siulersuisut aqutsisullu aaqqiissutissarsinngitsoormata, soorlu ippassaq aamma taamannak oqartunga. Kisianni NunaMinerals A/S-ip aningaasaqarnera NunaOil A/S-illu aningaasaqarnera nallersuunniarneqarnerat pissusissamisuunngilluinnarpoq.”

NunaOil A/S 100 procentimik Namminersorlutik Oqartussanit pigineqarpoq, Namminersorlutik Oqartussat taamaallaat 33 procentimik NunaMinerals A/S-imik piginneqataassuteqartoq. Nunani tamalaani selskabit uuliasiornermik aallutaqartut nunatta imartaani uuliasiorneranni pisortat peqataatinnissaat NunaOil-ip isumagisaraa, NunaMinerals niueqatigiiffimmut nalunaarsorneqarsimasoq nunatsinni aatsitassarsiornermik aningaasarsiutigalugu ineriartortitsinermik atuinissamillu siunertaqarsimalluni.

NunaOil A/S ippassaq apersuinermi oqaatigineqartutut akiliisinnaajunnaaqqajaanngilaq. Akerlianilli selskabip aningaasaqarnera nukittuujuvoq.

NunaOil A/S-imi ileqquusumik ulloq 22. april 2015 ataatsimeersuartoqassaaq selskabip najugaqarfiani.

 

Paasisaqarnerosuttut attavigisinnaavaat Tusagassiivimmi pisortaq, Paornánguaq Kleist, oqarasuaat +299 34 50 00 imaluunniit e-mail paok@nanoq.gl.